डॉक्टरची आठ लाखांची फसवणूक

कल्याण : सुशिक्षित बेरोजगार तरुणांना नोकरीचे आमिष दाखवून लाखोंचा गंडा घालण्यात आल्याच्या अनेक घटना उजेडात आल्या असतानाच एका महिला डॉकटरचीदेखील सिंगापूर येथे नोकरीचे आमिष दाखवून तब्बल सात लाख ७९ हजारांची फसवणूक करण्यात आल्याची घटना कल्याणात उघडकीस आली आहे. या प्रकरणी डॉक्टर महिलेने खडकपाडा पोलिस ठाण्यात तक्रार दाखल केली असून या तक्रारीनुसार पोलिसांनी पाच जणांविरोधात गुन्हा दाखल करत पुढील तपास सुरू केला आहे.

पश्चिमेकडील गोदरेज हिल परिसरातील शिवलीला वाधवा हाइट्समध्ये राहणाऱ्या एका डॉक्टरला स्वाती शर्मा, लुईस, अजय शर्मा, विशाल भारद्वाज, देवराज चव्हाण या पाच जणांनी सिंगापूर येथे नोकरी लावून देतो, असे आमिष दाखवत त्यांच्याकडे पैशांची मागणी केली. या पाच जणांच्या भूलथापांना बळी पडत या महिला डॉक्टरने त्यांच्या विविध खात्यांवर तब्बल ७ लाख ७९ हजार पाचशे रुपये जमा केले. बराच कालावधी उलटूनही नोकरीबाबत काहीच हालचाल न झाल्याने या महिलेला आपली फसवणूक झाल्याचे लक्षात आले. या डॉक्टर महिलेने याबाबत खडकपाडा पोलिस ठाण्यातत तक्रार नोंदवली. या तक्रारीनुसार पोलिसांनी स्वाती शर्मा, लुईस, अजय शर्मा, विशाल भारद्वाज, देवराज चव्हाण या पाच जणांविरोधात गुन्हा दाखल करत पुढील तपास सुरू केला आहे.