टीएमटीवर छापा

पहाटे पाच वाजता अधिकाऱ्यांची झाडाझडती

म. टा. विशेष प्रतिनिधी, ठाणे

टीएमटीच्या मनमानी कारभाराला चाप लावण्याचे प्रयत्न सध्या पालिकेच्या अधिकाऱ्यांकडून सुरू असून अतिरिक्त आयुक्त सुनील चव्हाण आणि उपायुक्त संदीप माळवी यांनी बुधवारी पहाटे पाच वाजता टीएमटीच्या वागळे आगारात 'छापा' टाकला. कामावर सबळ कारणाखेरीज गैरहजर असलेल्या आणि मनमानी पद्धतीने काम करणाऱ्यांविरोधात कठोर कारवाईचे आदेश देण्यात आले असून त्यापैकी दोन कर्मचाऱ्यांना निलिबंत करण्यात आले आहे. तर, दोघांना निलंबित का करू नये, अशा आशायाची कारणे दाखवा नोटीस बजावण्यात आली आहे. तसेच यावेळी आढळलेल्या कामचुकार कर्मचारी आणि अधिकाऱ्यांवर कठोर कारवाई करण्याचे आदेश चव्हाण यांनी दिले आहेत.

वागळे आगारामधून सकाळच्या सत्रामध्ये किती बसेस बाहेर पडल्या, किती बसेस नादुरुस्त आहेत आणि कोणत्या कारणांसाठी त्या नादुरुस्त आहेत, याची चव्हाण यांनी माहिती घेतली. तसेच नादुरुस्त बस का बाहेर पडल्या नाहीत, त्याला कोण जबाबदार आहे याची चौकशी करून संबंधितांवर कारवाई करण्याचे आदेशही त्यांनी दिले आहेत. वर्कशॉपनंतर चव्हाण आणि माळवी यांनी वाहतूक शाखेला भेट देऊन तेथल्या कामाची झाडाझडती घेतली. यावेळी त्यांनी किती ड्रायव्हर आणि कन्डक्टर यांनी बसेस बाहेर काढल्या त्याची माहिती घेतली. जे कर्मचारी कामावर हजर नव्हते त्यांच्यावरही कारवाई केली जाणार असल्याचे संदीप माळवी यांनी सांगितले.