रासायनिक प्रदूषणाने बदलापूरची घुसमट

म. टा. वृत्तसेवा, बदलापूर

बदलापूर येथील माणिकीवली येथील एमआयडीसी क्षेत्रातील लक्ष्मी कंपनीतून सोडण्यात येणाऱ्या केमिकलच्या उग्र वासाने सोमवारी पहाटे नागरिकांच्या संतापाचा कडेलोट झाला. परिसरातील नागरिक व नगरसेवकांनी या कंपनीच्या गेटला टाळे ठोकत एमपीसीबीच्या अधिकाऱ्यांना याबाबत कळवले.

नुकताच काही महिन्यांपूर्वी जाहीर करण्यात आलेल्या केंद्र सरकारच्या अहवालात बदलापूरचा सर्वाधिक वायुप्रदूषित शहरांमध्ये समावेश करण्यात आला होता. मात्र शहरातील परिस्थिती सुधारली नसून बदलापूर पूर्व भागातील माणिकीवली परिसतील एमआयडीसीत काही केमिकल कंपन्यांमधून वारंवार पहाटेच्या सुमारास हवेत केमिकल सोडत असल्याचा प्रकार समोर येत आहे. त्यात सोमवारी पहाटे या भागातील नागरिकांना मळमळ होणे, उलट्या होणे, श्वास घेण्याचा त्रास होऊ लागला होता. अखेर याबाबत परिसरातील काही तरुणांनी पाहणी केली असता लक्ष्मी कंपनीत डायथाइल बेन्झोमाइल हे रसायन तयार करण्यात येते. ही कंपनी मागील काही महिन्यांपासून रात्री तसेच पहाटे हवेत मोठ्या प्रमाणात कंपनीतील रसायन सोडत असल्याचा आरोप स्थानिकांनी केला आहे.

या प्रकाराबाबात महाराष्ट्र प्रदूषण नियंत्रण मंडळाकडे तक्रारीही केल्याचे स्थानिकांनी सांगितले. त्यामुळे अखेर केमिकल कंपनीतील उग्र वासाने त्रस्त झालेल्या नागरिकांसह स्थानिक नगसेवक अविनाश भोपी यांनी सोमवारी सकाळी कंपनीच्या गेटला टाळे ठोकले. यानंतर स्थानिकांनी एमपीसीबीच्या अधिकाऱ्यांशी संपर्क केला असता त्यांनी घटनास्थळी धाव घेतली. दरम्यान, एमपीसीबीने कंपन्यांवर योग्य कारवाई न केल्यास भाजप आंदोलन करणार असल्याचे नगरसेवकांनी सांगितले. तर एमपीसीबीच्या ​अधिकाऱ्यांनी याप्रकरणी अहवाल तयार करत तो वरिष्ठांकडे पाठवल्याची माहिती दिली आहे.