कामोठे, खारघरमध्ये भाषणाच्या तोफा धडाडणार
म. टा. वृत्तसेवा, पनवेल
लोकसभा निवडणुकीच्या दुसरा टप्प्याचे मतदान पार पडल्यानंतर देशाचे लक्ष लागलेल्या मावळ मतदारसंघाकडे प्रचाराच्या तोफा वळल्या आहेत. युतीचे उमेदवार श्रीरंग बारणे यांच्या प्रचारासाठी मुख्यमंत्री देवेंद्र फडणवीस तर आघाडीचे उमेदवार पार्थ पवार यांच्या प्रचारासाठी राष्ट्रवादीचे अध्यक्ष शरद पवार पनवेलमध्ये सभा घेणार आहेत. या दोन्ही बड्या नेत्यांच्या सभा मंगळवारीच कामोठे आणि खारघरमध्ये होत आहेत.
पुणे आणि रायगड जिल्ह्याचा काही भाग एकत्र करून तयार केलेल्या मावळ लोकसभा मतदारसंघात यंदा शिवसेनेचे खासदार श्रीरंग बारणे यांच्या विरोधात शरद पवार यांचे नातू, अजित पवार यांचे चिरंजीव पार्थ पवार यांना उमेदवारी दिल्यामुळे चांगलीच रंगत आली आहे. मागील महिनाभरापासून मोठ्या जोशात प्रचार सुरू आहे. पुणे आणि रायगड जिल्ह्यात प्रचार करताना उमेदवारांची पुरती धावपळ होते आहे. २९ एप्रिल रोजी मतदान होणार असल्यामुळे दोन्ही पक्षाचे दिग्गज नेत्यांच्या सभा मावळ लोकसभा मतदारसंघात मागील दोन आठवड्यात झाल्या नव्हत्या. २३ एप्रिल रोजी दुसऱ्या टप्प्यातील मतदान संपल्यानंतर सर्व दिग्गज नेत्यांनी आपला मोर्चा मावळकडे वळविला आहे. २३ एप्रिल रोजी कामोठ्यातील नालंदा बौद्धविहार मैदानावर दुपारी साडेतीन वाजता जाहीर सभेचे आयोजन करण्यात आले आहे. पवार कुटुंबीयांतील उमेदवाराला पराभूत करण्यासाठी मुख्यमंत्री या भागात बारकाईने लक्ष घालणार असल्याचे समजते. याच दिवशी पवार यांचीही सभा होत असून खारघर सेक्टर १५ येथील घरकुल मैदानावर शरद पवार यांच्या सभेचे आयोजन करण्यात आले आहे.