प्रस्थापित डॉ. राणे पॅनेलला नमो पॅनेलने उभे केले आव्हान
म. टा. वृत्तसेवा, नवी मुंबई
गेली तीस वर्षे नवी मुंबई स्पोर्ट्स क्लबचा क्रीडाक्षेत्रात अपेक्षित असा विकास झाला नसल्याने शिस्त, पारदर्शकता आणि क्लबचा अधिक विकास, यासाठी नमो पॅनल नवी मुंबई स्पोर्ट क्लबची पंचवार्षिक निवडणुक लढवीत असल्याचे पॅनेलचे प्रमुख विठ्ठल मोरे यांनी सांगितले.
४० वर्षांपूर्वी सुमारे सोळा एकर जमिनीवर वाशी येथे निर्माण करण्यात आलेल्या नवी मुंबई स्पोर्ट्स क्लबची सूत्रे वानखेडे यांच्याकडे असताना क्लबने खेळांसंदर्भात अनेक कामे करण्यात आली. सध्या तीस वर्षांपासून संचालक मंडळाने नवी क्रीडा सुविधा निर्माण करण्याऐवजी मनमानी कारभार सुरू केला असल्याचा आरोप नमो पॅनेलचे प्रवर्तक विठ्ठल मोरे यांनी केला आहे. या ठिकाणी असलेल्या क्रीडा सुविधांसाठी एनएमएसएच्या सदस्यांकडून अवास्तव पैसे आकारले जात असल्याचा आरोप विठ्ठल मोरे यांनी केला आहे.
येत्या १८ ऑगस्ट रोजी होत असलेल्या नवी मुंबई स्पोर्ट्स क्लबच्या संचालक पदाच्या निवडणुकीत गेली ३० वर्षे क्लबचा कारभार हाकणाऱ्या डॉ. राणे पॅनेलला यंदा मात्र नमो पॅनेलने आव्हान उभे केले आहे. उपाध्यक्ष, सेक्रेटरी, खजिनदार, सहखजिनदार या प्रमुख पदांसह बारा संचालक पदांसाठी होणाऱ्या निवडणुकीत नवी मुंबई स्पोर्ट्स क्लबमध्ये सुरू असलेला बेशिस्त कारभार सुधारणे, पारदर्शक कारभार आणणे आणि स्पोर्ट्स क्लबचे क्रीडा क्षेत्रात नाव अधिक उंच करण्याचा प्रयत्न नमो पॅनेल करणार असल्याचेही विठ्ठल मोरे व अॅड. नीलेश भोजने यांनी सांगितले.