कोस्टल रोडचा मार्ग मोकळा

एमएमआरडीए करणार अर्थसहाय्य

म. टा. विशेष प्रतिनिधी, ठाणे

३०० कोटींवरून हजार कोटींवर खर्च झेपावलेला ठाणे कोस्टल रोड हा दोन शहरांना जोडणारा (इंटरसिटी) असल्याने त्यासाठी एमएमआरडीएने निधी उपलब्ध करून द्यावा, ही ठाण्याचे आयुक्त संजीव जयस्वाल यांनी केलेली मागणी राज्याचे मुख्यमंत्री देवेंद्र फडणवीस यांनी मान्य केली आहे. त्यामुळे या रस्त्याच्या मार्गात आलेला प्रमुख अडसर दूर झाल्याचे सांगितले जात आहे.

अन्य भागांतून ठाण्यात प्रवेश करताना तसेच, मुंबईहून ठाण्याच्या बाहेर जाताना घोडबंदर रोडवर होणारी अभूतपूर्व वाहतूककोंडी फोडण्यासाठी प्रस्तावित केलेल्या खारीगाव-गायमुख कोस्टल रोडच्या मार्गाला पर्यावरण विभाग आणि संरक्षण खात्याने मंजुरी दिली आहे. मात्र, १२ किमी लांबीचा खाडी पूल आणि ५०० मीटरचा बोगदा अशा पद्धतीने या रस्त्याची उभारणी करण्याची सक्ती करण्यात आल्याने या मार्गाचा खर्च ३०० कोटींवरून एक हजार कोटींवर गेला आहे. त्यामुळे पालिकेला हा निधी उभारणे शक्य नसून त्यासाठी एमएमआरडीएने अर्थसहाय्य करावे, यासाठी पालिका आयुक्त प्रयत्नशील होते.

जागतिक आदिवासी दिनाचे औचित्य साधून ठाण्यात आयोजित केलेल्या एका कार्यक्रमासाठी मुख्यमंत्री ठाण्यात आले होते. त्यावेळी आयुक्तांनी या कोस्टल रोडला अर्थसहाय्य करण्याची विनंती मुख्यमंत्र्यांकडे केली होती. ती फडणवीस यांनी मान्य केल्याची माहिती सूत्रांनी दिली. मुंब्रा खारीगाव येथील खाडीपात्रापासून सुरू होणारा हा रस्ता घोडबंदर रोडला समांतर असेल. सुमारे १२ किमी लांबीचा हा रस्ता पूर्णतः पुलाच्या स्वरूपात उभारला जाणार आहे. संरक्षण विभागाच्या अकबर कॅम्प परिसरात ५०० मीटरच्या बोगद्यातून हा रस्ता मार्गक्रमण करणार आहे.