स्टेशनवरील चित्रे जाहिरातींआड

स्टेशनवरील चित्रे जाहिरातींआड

म. टा. वृत्तसेवा, ठाणे

ठाणे रेल्वे स्टेशनच्या गावदेवी पादचारी पुलावरून चालताना काही दिवसांपूर्वी सामाजिक संदेश देणारी चित्र नजरेस पडायची. जाणारा-येणारा प्रत्येक प्रवासी चालताना क्षणभर थांबायचा आणि काढलेली चित्र पाहूनच पुढचा प्रवास करायचा. समाजाला संदेश देऊ पाहणाऱ्या चित्रांवर आता मात्र विविध खासगी नोकरीची आमिष दाखवणारी स्टिकर लावण्यात आल्याने चित्र विद्रुप झाली आहेत.

काही महिन्यांपूर्वी मध्य रेल्वे स्थानकातील स्टेशन साफ करण्याचा आणि स्टेशनवरील भिंती रंगवण्याचा एक स्तुत्य उपक्रम काही युवकांनी हाती घेतला होता. या उपक्रमाचे सामान्य नागरिकांनी कौतुकही केले होते. संपूर्ण ठाणे स्थानकाचा चेहरा त्यामुळे बदलला होता. स्त्रीभ्रूण हत्या, हुंडाबळी, स्त्री-पुरुष समानता अशा आशयाचे चित्र रेखाटण्यात आली होती. रेल्वेच्या हमालांपासून नाबाद १६३ वर्षांच्या रेल्वेच्या सुखद आठवणीही चित्राच्या माध्यमातून जिवंत करण्यात या युवकांना यश आले होते. कोणत्याही पैशाची अपेक्षा न करता सामाजिक, भावनेतून आंतर्प्रेरणेतून ही चित्र स्टेशन परिसरात आकाराला आली होती. त्यामुळे या चित्रांना अधिक महत्व प्राप्त झाले होते. असे असताना काही दिवसांतच अशाप्रकारे खाजगी जाहिरातीचे स्टिकर लावून चित्रांना विद्रुप करण्यात आले आहे.

खासगी जाहिरातींचे स्टिकीर स्टेशन परिसरात जागोजागी लावण्यात येत आहेत. परंतु, ज्या ठिकाणी सुशोभित करण्यात आलेला भाग आहे, जिथे समाजाला उद्देशून चित्राच्या माध्यमातून विचार सांगण्यात आला आहे, अशा ठिकाणी तरी स्टिकर लावताना विचार केला जावा, असे काही प्रवाशांनी सांगितले. या स्टिकरचे प्रताप तर केलेले आहेतच त्या व्यतिरिक्त काही चित्रांवर पान-तंबाकू खाऊन पिंक टाकल्याने संबधित चित्र लालेलाल झाले आहे. सामाजिक भावनेतून केलेल्या अशा कामाची कदर सामान्य माणसाला नसते, याचे हे उदाहरण म्हणता येईल. इथे चित्र काढणाऱ्या प्रत्येक युवा चित्रकाराने मन लावून, वेळ देऊन चित्र साकारली होती. त्या चित्रकारांच्या कलेचा हा अपमान असल्याचे हा मोहिमेत स्वयंस्फूर्तीने सहभागी झालेले सागर गाडे म्हणाले.