म. टा. वृत्तसेवा, मिरा भाईंदर
मिरा भाईंदर महानगर पालिकेमार्फत करोना विषाणूचे रुग्ण आढळल्यास त्वरित उपचार करता यावा यासाठी डेल्टा गार्डन इमारतीच्या मागील बाजूस असलेल्या म्हाडा इमारतीमध्ये करोना संशयित रुग्णांसाठी कक्ष तयार करण्याचे काम सुरू असतानाच त्याला स्थानिक नागरिकांनी विरोध दर्शविला आहे .
डेल्टा गार्डन परिसरातील नागरिकांनी स्थानिक नगरसेवकांसह पालिका मुख्यालयात महापौर ज्योत्स्ना हसनाळे व आयुक्त चंद्रकांत डांगे यांना परिसरात सुरू करण्यात आलेले म्हाडाच्या इमारतीतील विलगीकरण केंद्राचे काम रोखण्यात यावे त्यामुळे परिसरातील लोकांना देखील त्रास होऊ शकतो त्यामुळे पत्र देऊन आपला विरोध दर्शविला आहे.
महापालिकेमार्फत म्हाडा इमारतीमध्ये संशयित रुग्णांसाठी कक्ष बनवण्याचे काम सुरू आहे त्या इमारतीच्या आजूबाजूच्या वस्तीमध्ये मोठ्या इमारतींसोबत झोपडपट्टी, चाळी असल्याने पांडुरंगवाडी, महाजनवाडी, रायकरवाडी, पेणकरपाडा, मीरा गावठाण, मुन्शी कम्पाऊंडसारखे परिसर, शाळा, कॉलेजे, धार्मिक स्थळे, सार्वजनिक गार्डन्स या परिसरात मोठ्या प्रमाणावर आहेत. सदर परिसर अत्यंत दाटीवाटीचा व मुंबई, ठाण्याकडे जाण्यासाठीचा मुख्य रस्ता असल्याने असल्याने या परिसरात करोना संशयितांसाठी कक्ष सुरू करणे हे मोठ्या लोकवस्तीच्या आरोग्यासाठी हानिकारक आहे. सदर निर्णय मोठ्या उद्रेकासाठी कारणीभूत ठरेल, अशा प्रकारच्या भावना लोक व्यक्त करू लागले आहेत. पालिकेच्या करोना विषाणूविरोधातील लढाईला आमचा पाठिंबा आहेच, मात्र कक्षाची जागानिवड चुकीच्या माहितीवर आधारित असल्याचे स्थानिकांचे म्हणणे आहे.
महापालिकेने चुकीचा निर्णय घेतला असून करोनाच्या संशयित रुग्णांच्या उपचारासाठी विलगीकरण केंद्र सुरू करण्यात येणार आहे. त्याला स्थानिक नागरिकांसोबतच नगरसेवकांचाही विरोध आहे. विलगीकरण केंद्र इतर ठिकाणी स्थलांतरित करावे.
वीणा भोईर, स्थानिक नगरसेविका