म. टा. प्रतिनिधी, ठाणे
नियोजित चाळीतील खोल्यांच्या खरेदी-विक्रीचा व्यवहार २०१२मध्ये करूनही खोल्या न देता मुंबई, ठाणे, नवी मुंबई, कल्याणमधील एकूण २७ नागरिकांची फसवणूक करणाऱ्या ठाण्यातील वैष्णवी कनस्ट्रक्शन प्रा. लिमिटेड कंपनीचे भूषण पाटील याच्याविरुद्ध कळवा पोलिस ठाण्यात फसवणुकीचा गुन्हा दाखल करण्यात आला आहे. २५ लाख ५५ हजारांची ही फसवणूक आहे.
विलेपार्ले येथील शिवाजी सकपाळ (५२) यांच्यासह इतरांना नवीन खोली खरेदी करायची होती. खोलीच्या शोधात असताना भूषण पाटील हा कळव्यातील विटावा येथे खोल्या बांधून विकत असल्याची माहिती त्यांना समजली. त्यानुसार जय हनुमान को. ऑप. हौसिंग सोसायटीच्या नियोजित चाळीतील घराच्या खरेदीबाबत करारनामा करण्यात आला होता. प्रत्येक खोलीची किंमत तीन लाख ९० हजार इतकी होती. सकपाळ यांच्यासह २१ जणांनी मिळून पाटील याला १८ लाख २० हजार रुपये दिले होते. सहा महिन्यांत खोलीचा ताबा मिळाल्यानंतर उर्वरित रक्कम पाटील याला देण्याचे निश्चित केले होते. मात्र नागरीकांना करारनाम्याप्रमाणे मुदतीत खोली मिळाली नाही. त्यानंतर भूषण पाटील याच्याविरुद्ध फसवणुकीचा गुन्हा दाखल झाला असून आरोपीने इतरही सहा जणांना अशा प्रकारे गंडा घातला आहे.