गुंड सिध्दू अभंगे अटकेत

तडीपार असूनही कोपरीतील विविध गुन्ह्यात सहभाग

म. टा. प्रतिनिधी, ठाणे

तडीपार असूनही विविध गुन्ह्यात सक्रीय सहभाग असलेला ठाण्यातील कुख्यात गुंड सिद्धेश बाळा म्हसकर उर्फ सिद्धू अभंगे (२६) याला बुधवारी उशिरा रात्री ठाणे पोलिसांनी उपवन परिसरातून नाट्यमयरित्या अटक केली. विशेष म्हणजे, पोलिसांना वेळोवेळी गुंगारा देणाऱ्या सिद्धू अभंगेसाठी पोलिसांनी आखलेल्या व्यूहरचनेत तो अलगद अडकला. त्याच्या अटकेमुळे नुकत्याच सुरू झालेल्या नवरात्रोत्सवातील जबरी हाणामारीच्या गुन्ह्यांना काही प्रमाणात अटकाव बसवण्याची शक्यता आहे. दरम्यान, न्यायालयाने त्याला सात दिवसांची पोलिस कोठडी सुनावली आहे.

कोपरी भागातील सिद्धार्थनगर येथे राहणाऱ्या सिद्धू अभंगे याच्यावर ठाणे पोलिस आयुक्त क्षेत्रात खंडणी, मारामारी तसेच खुनाचा प्रयत्न आदी प्रकरणातील ६ ते ७ गंभीर गुन्हे दाखल होते. याआधी २०१५ साली मे महिन्यात ठाणे गुन्हे शाखेच्या मध्यवर्ती शाखेचे वरिष्ठ पोलिस निरीक्षक देविदास घेवारे आणि त्यांच्या पथकाने अभंगे याला कल्याण परिसरात सापळा रचून अटक केली होती. त्यावेळी त्याच्याकडून एक गावठी कट्टा आणि दोन जिवंत काडतुसे जप्त करण्यात आली होती. त्यानंतर तडीपारीची कारवाई करण्यात आलेल्या अभंगे याने कोपरी भागात चैत्र नवरात्रौत्सवातील देवीच्या मिरवणुकीदरम्यान त्याच्या २० ते २५ साथीदारांच्या मदतीने खुलेआम हत्यारासह धुडगूस घातला होता. यावेळी चॉपर आणि चाकूने वार करत अभंगे आणि त्याच्या साथीदाराने त्या तरुणावर जीवघेणा हल्ला करून पलायन केले होते. या प्रकरणी त्याच्या विरोधात कोपरी पोलिस ठाण्यात गुन्हा दाखल करण्यात आला होता. मात्र त्यानंतर सतत पोलिसांच्या पथकांना गुंगारा देणाऱ्या अभंगेबाबत परिमंडळ पाचचे सहाय्यक पोलीस आयुक्त बाजीराव भोसले यांना माहिती मिळाली. त्यानुसार त्यांनी सापळा रचून उपवन भागातून अटक केली. यावेळी त्याच्याकडून कोणतेही शस्त्र सापडले नसून अवघ्या काही मिनिटांच्या माहितीनंतर त्याच्या मुसक्या आवळण्यात आल्याची माहिती सहाय्यक पोलीस आयुक्त बाजीराव भोसले यांनी 'मटा'शी बोलताना दिली.


नवरात्रोत्सवाचा योगायोग

चैत्र नवरात्रौत्सवाच्या मिरवणुकीत अभंगे याने गोंधळ घातल्यानंतर तो ठाणे शहरातून फरार झाल्याचे सांगण्यात येत होते. मात्र नुकताच झालेला गणेशोत्सव तसेच विविध कार्यक्रमांसाठी अभंगे कोपरीत हजेरी लावत असल्याच्या खमंग चर्चा रंगत होत्या. शहरातील बड्या राजकीय नेत्यांसमवेत असलेल्या त्याच्या व्हिडीओने सोशल मीडियावर धुमाकूळ घातला होता. त्यातच या काळात दोनवेळा पोलिसांच्या हातावर तुरी देऊन पळून जाण्यात अभंगे यशस्वी ठरला होता. मात्र नवरात्रोत्सवाच्या पूर्वसंध्येलाच पोलिसांनी अभंगेच्या मुसक्या आवळल्याने त्याच्या दहशतीला पूर्णविराम मिळाला आहे.