१२ ते १८ वयोगटातील मुलांमध्ये ड्रग्ज, चोरीचे प्रमाण अधिक
म. टा. वृत्तसेवा, ठाणे
गेल्या काही दिवसांपासून अंमी पदार्थांची विक्री-तस्करी आणि चोरीच्या गुन्ह्यामध्ये झपाट्याने वाढ होत आहे. यामध्ये १२ ते १८ वयोगटातील पाचशेहून अधिक मुले वर्षभरात या गुन्ह्यामध्ये सापडली असल्याची धक्कादायक माहिती पुढे आली आहे. अंमली पदार्थांसदर्भातील गुन्ह्यांमध्ये अशा अल्पवयीन मुलांचा वापर करून घेतला जात असल्याचे वास्तव आहे.
गेल्या काही वर्षात गुन्हेगारी विश्वामध्ये अल्पवयीन मुलांचा सहभाग मोठ्या प्रमाणात वाढला आहे. बदलेली जीवनशैली, चुकीच्या संगतीत असणे, सोशल मीडियाचा अधिक वापर, कुटुंबातील संवाद कमी, घरची हलाखीची परिस्थिती, पालकांचे घटस्फोट या कारणामुळे शिक्षण घेण्याच्या वयात ही मुले गुन्हेगारीकडे वळत आहेत. तसेच गुन्हेगारी कृत्य करणाऱ्या टोळीकडून लहान मुले लक्ष्य होत असल्याचे काही घटनांमधून समोर आले आहे. काही दिवसांपूर्वी पोलिसांनी ५ ते ६ अल्पवयीन मुलांकडून दोन किलो ड्रग्ज जप्त केले. या प्रकरणाचा तपास केला असता गुन्हेगारी टोळ्यांकडून अशा मुलांचा वापर केला जात असल्याचे उघड झाले आहे.
दरवर्षी बालगुन्हेगारीच्या विळख्यात एक हजाराहून अधिक मुले अडकतात. मात्र त्यापैकी ५०० हून अधिक अल्पवयीन मुलांची रवानगी निरीक्षणगृहात केली जाते. तर अनेकांना न्यायालयाकडून तत्काळ जामीनही मंजूर केला जातो. ठाण्यात १२ ते १८ वयोगटातील अल्पवयीन मुलांमध्ये चोरी, धूम स्टाइलने चेन स्नॅचिंग, ड्रग्ज, खून, बलात्कार अशा गुन्ह्यातील सहभाग अधिक असल्याचे सांगण्यात आले आहे.
दृष्टीक्षेप
२०१७-१८
निरीक्षणगृहात दाखल मुले
५२८
निरीक्षणगृहातून सुटलेली मुले
५०६
एप्रिल व मे २०१८
निरीक्षणगृहात दाखल मुले
८३
निरीक्षणगृहातून सुटलेली मुले
४९
दरवर्षी निरीक्षणगृहात दाखल होणाऱ्या मुलांची संख्या ५०० हून अधिक असली तरी जिल्ह्यात सरासरी एक हजार मुलांकडून दरवर्षी गुन्हा घडत असतो. अनेक मुले ही परिस्थितीमुळे गुन्हेगारीकडे वळलेली असतात. तर काही मुले नकळत या जाळ्यात अडकत गेलेली आहेत. जिल्ह्यात सर्वाधिक मुले ही अंमली पदार्थ विक्री आणि चोरीच्या गुन्ह्यात निरीक्षणगृहात दाखल झाली आहेत. या मुलांचे समुपदेश केले जात आहे.
- साहेब पगारे, अधीक्षक, महिला व बाल विकास विभाग