‘गुन्हेगार’ प्रतिनिधी!

गुन्हे दाखल असलेले ३९ नगरसेवक

म. टा. वृत्तसेवा, ठाणे

गुन्हे दाखल असलेले ३९ उमेदवार ठाणे महापालिकेत जनतेचे प्रतिनिधित्व करणार असून त्यात सर्वपक्षीय नगरसेवकांचा समावेश आहे. शिवसेना, भाजप, राष्ट्रवादी काँग्रेस आणि काँग्रेस अशा सर्वच पक्षातील उमेदवारांवर गुन्हे आहेत. तसेच गंभीर गुन्हे असलेले उमेदवारही विजयी झाले आहेत.

गुन्हेगारांना मिळालेली उमेदवारी आणि काही गुन्हेगारांचा पक्षप्रवेश यामुळे ठाणे महापालिकेची निवडणूक गाजली. निवडणुकीच्या तोंडावर एका सराईत गुन्हेगाराने भाजपामध्ये केलेल्या प्रवेशामुळे जोरदार खळबळ माजली होती. ठाण्यात गुन्हेगारी पार्श्वभूमी असलेल्या उमेदवारांना सर्वच राजकीय पक्षांनी उमेदवारी दिली होती. खंडणी, खून, मारामारी आदी गंभीर गुन्ह्यांसह राजकीय स्वरूपाचे गुन्हे काही उमेदवारांच्या नावावर असून एकापेक्षा अधिक गुन्हे दाखल असलेल्या काही उमेदवारही निवडणूक लढवत होते. तर, गंभीर गुन्हे दाखल असलेल्या उमेदवारांची संख्या महाराष्ट्र नवनिर्माण सेनेमध्ये अधिक होती. एकंदरीत पालिका निवडणुकीत एकूण ८०५ उमेदवारांपैकी १३१च्या आसपास उमेदवारांवर वेगवेगळ्या स्वरूपाचे गुन्हे दाखल होते. त्यापैकी जण ३९ नगरसेवक झाले आहेत.

कुणाचे? किती?

शिवसेना २०

राष्ट्रवादी काँग्रेस १२

भाजप ६

काँग्रेस १

गंभीर गुन्हे असलेले प्रतिनिधी

नारायण पवार, नजीब मुल्ला, मधुकर पावशे, गणेश कांबळे, उमेश पाटील, नरेश म्हस्के, एकनाथ भोईर, संजय वाघुले, दिलीप बारटक्के, मिलिंद पाटणकर, मुकेश मोकाशी