म. टा. प्रतिनिधी, ठाणे
संगीत, नृत्य यांचा मेळ साधणारा संस्कृती युवा प्रतिष्ठान ट्रस्ट आयोजित 'टाइम्स संस्कृती आर्ट्स फेस्टिव्हल' ११ ते १४ जानेवारी या कालावधीत ठाण्यात रंगणार आहे. उपवन येथे रंगणाऱ्या या महोत्सवाचे यंदाचे पाचवे वर्ष असून यंदा आपले पर्यावरण रक्षण असा संदेश महोत्सवाच्या माध्यमातून दिला जाणार आहे.
यंदाच्या महोत्सवाच्या निमित्ताने यंदाही अनेकविध क्षेत्रातील मान्यवर मंचावर एकत्र येणार असून प्रसिद्ध संगीतकार दर्शन रावल, मित्तल ब्रदर्स यांच्या सादरीकरणासह गझलनवाज जसविन्दर सिंग, इंडो किवी यूट्युब ग्रेच शरले सेटीया यांचाही समावेश आहे. ६०० हून अधिक देशांमधील कलाकारा यानिमित्ताने ठाण्यात दाखल होणार असून या महोत्सवात आपली कला सादर करणार आहेत. युवा कलाकारांचा अधिक समावेश यंदा महोत्सवात असून सादरीकरणांसह भारतीय हस्तकला, खाद्यपदार्थ, प्रकाश आणि लेझर शो, हस्तकला कार्यशाळा यांची विविध कलादालने रसिकांना अनुभवता येणार आहेत. त्यासह साहस स्पर्धांचेही आयोजन केले जाणार आहे. प्लास्टिकबंदीला अनुसरून त्याचा पुनर्वापर करण्याबाबतही माहिती दिली जाणार असल्याची माहिती महोत्सवाचे आयोजक आ. प्रताप सरनाईक यांनी दिली.