डोंबिवलीत फडके रोडवर जमावबंदी

म. टा. वृत्तसेवा, कल्याण : डोंबिवली पूर्वेकडील फडके रोडवर दिवाळी पहाटेला फुलणारी तरुणाई यंदा करोनाच्या पार्श्वभूमीवर तिकडे फिरकणार नाही, असे अपेक्षित असले तरी काही हौशी तरुण मंडळी या दिवशी फडके रोडवर गर्दी करण्याची शक्यता लक्षात घेऊन फडके रोडसह आजूबाजूच्या रस्त्यांवर पोलिसांनी जमावबंदीचे आदेश दिले आहेत. दिवाळीच्या काळात हे आदेश डावलणाऱ्यांवर कारवाई केली जाणार असल्याचे फलक रामनगर पोलिसांनी लावले आहेत. यामुळे शासन आदेश धुडकावून दिवाळी साजरी करण्यासाठी फडके रोडवर जाण्यास मज्जाव असणार आहे.

दिवाळी पहाट आणि डोंबिवलीतील फडके रोडची अनेक वर्षांपासून घट्ट वीण आहे. काळानुसार या गर्दीत समाविष्ट होणाऱ्यांमध्ये अनेक बदल झाले. शहराचे रंगरूप पालटले. मात्र, फडके रोड आणि सळसळत्या तरुणाईचे नाते अभेद्य राहिले होते. फडके रोडबरोबरच आजूबाजूचा परिसर देखील यादिवशी जणू तरुण होतो. हळूहळू ही प्रथा कल्याणातील दुर्गाडी परिसरातही वाढू लागली आहे. मात्र, यंदा करोनाच्या पार्श्वभूमीवर नागरिकांना वारंवार गर्दी न करण्याचे आवाहन केले जात असले तरीही मागील आठ महिन्यांपासून एकांतात घरात कोंडून घेणाऱ्या नागरिकांनी निर्बंध झुगारून बाहेर पडण्यास सुरुवात केली आहे. यामुळेच शासनाच्या आवाहनानंतरही हौशी तरुणाई आपल्या आवडत्या फडके रोडवर दिवाळी पहाटेचा आनंद घेण्यासाठी येण्याची भीती पोलिसांसह प्रशासनाला वाटत आहे. यामुळेच खबरदारीचा उपाय म्हणून फडके रोड, नेहरू रोड, टिळकरोड, रेल्वे समांतर रस्ता या सर्व रस्त्यांसह दिवाळीच्या काळात आजूबाजूच्या परिसरात देखील जमावबंदी जाहीर केली आहे. तसेच आदेश मोडणाऱ्यांवर कारवाईचा इशारा दिला आहे. यामुळे यंदा इतिहासात प्रथमच फडके रोडला दिवाळीचा उत्साह अनुभवता येणार नाही.