रोज पाच स्वाइनरुग्ण

एका महिन्यात २६७ रुग्णांना बाधा

म. टा. वृत्तसेवा, ठाणे

वैद्यकीय विभागांकडून होणाऱ्या उपचारांना न जुमानता जिल्ह्यात स्वाइन फ्लू दिवसेंदिवस झपाट्याने फोफावत असल्याचे दिसून येत आहे. मागील एका महिन्यात जिल्ह्यात २६७ रुग्णांना स्वाइनची बाधा झाली असून जिल्ह्यात दररोज किमान पाच जणांचा या रोगामुळे मृत्यू होत असल्याने डॉक्टरांनी सतर्कतेचा इशारा दिला आहे.

वातावरणातील बदलांमुळे साथीचे आजार झपाट्याने वाढत असले तरी जून महिन्यापासून बळावलेल्या स्वाइन फ्लूवर नियंत्रण आणणे अद्याप शक्य झाले नसल्याचे दिसून येते. मुंबई आणि पुण्यापाठोपाठ ठाणे जिल्ह्यातील स्वाइनचा विळखा दिवसेंदिवस घट्ट होत असून स्वाइनबाधित रुग्णांची संख्याही वाढत आहे. जून महिन्यात मोजक्या रुग्णांमध्ये स्वाइनची लक्षणे दिसत होती. मात्र महिन्याच्या अखेरीला जिल्ह्यात तब्बल १९२ संशयितांपैकी १५४ रुग्णांना स्वाइननी गाठले असल्याचे सिद्ध झाले. त्याचवेळी या रोगामुळे १४ जणांना आपला जीवही गमवावा लागल्याची नोंद आरोग्य विभागाकडून घेण्यात आली. त्यानंतर स्वाइनला आळा घालण्यासाठी आरोग्य विभागाकडून युद्धपातळीवर प्रयत्न सुरू झाले असले तरी त्याचा पुरेसा परिणाम होत नसल्याचे रुग्णांच्या वाढत्या आकडेवारीवरून दिसत आहे. जिल्ह्यात दररोज सरासरी पाच ते सहा रुग्णांची स्वाइन फ्लू बाधित म्हणून नोंद होत आहे.

महिलांना सर्वाधिक लागण

गेल्या एका महिन्यात हा आकडा तब्बल २६७ वर पोहोचला असून मृतांच्या संख्येतही वाढ झाली आहे. यामध्ये ठाणे शहर तसेच कल्याण या परिसरात स्वाइन फ्लूचे आतापर्यंत सर्वाधिक रुग्ण आढळल्याचे दिसून आले. गेल्या सहा महिन्यांत ठाण्यात २६१ रुग्णांना स्वाइनची लागण झाली असून तब्बल १३ जणांना जीव गमवावा लागला आहे, तर कल्याणमध्ये ८७ रुग्णांचा समावेश असून तिघांचा स्वाइनने मृत्यू झाला आहे. नवी मुंबईमध्ये ३१ रुग्णांची नोंद आहे, तर भिवंडीमध्येही तीन रुग्ण उपचार घेत आहेत. मृतांमध्ये महिलांचे प्रमाण अधिक असल्याचे डॉक्टरांतर्फे सांगण्यात येते.

सरकारी यंत्रणांचे प्रयत्न

शासकीय रुग्णालयात स्वाइन फ्लूचा स्वंतत्र वॉर्ड तयार करून उपचार सुरू करण्यात आले असले तरी प्रतिबंधात्मक लसीकरणांचा अद्याप पत्ताच नाही. परिणामी लक्षणे आढळल्यानंतर उपचार घेणाऱ्यांची संख्या अधिक आहे. खासगी रुग्णालयात हे लसीकरण उपलब्ध आहे. मात्र सरकारी यंत्रणांनी कमी दरात ते उपलब्ध करून दिले तर अनेकांना त्याचा फायदा होईल, असे डॉ संदीप ढोमसे यांनी सांगितले.