म. टा. वृत्तसेवा, वसई
विरारजवळील अर्नाळा सागरी पोलिस ठाण्याच्या हद्दीत ओलांडा चौकीवर कायमस्वरुपी दिवस-रात्र पोलिस कर्मचाऱ्यांचा बंदोबस्त ठेवण्याची मागणी येथील नागरिकांकडून होत आहे.
कोफराड-नंदाखाल येथील ओलांडा चौकीवर दिवस/रात्र पोलिस बंदोबस्त ठेवण्यात यावा असे साकडे घालण्यात आले आहे. सत्पाळा-राजोडी-वटार-उंबरगोठण-नंदाखाल -आगाशी-चाळपेठ-अर्नाळा या ग्रामीण भागातून अनेक स्त्रिया पहाटे ४.३० ते सकाळी ७ पर्यंत आपल्या दुचाकीवरून विरार स्टेशन गाठतात व पुढे मुंबईला कामानिमित्त जातात. एकट्या दुकट्या जाणाऱ्या स्त्रिया आणि अंधारामुळे इथे सोनसाखळी व मंगळसूत्र चोरण्याचे प्रकार होत असतात.
गेल्या आठवड्यात नंदाखालमार्गे ओलांडा येथे आपल्या वाहनावरून जात असताना अज्ञात चोरट्याने एका महिलेचा पाठलाग केला, त्या महिलेला धक्का मारला, ती महिला गाडीवरून पडता-पडता वाचली. थंडीमुळे स्वेटर असल्याने चोराला मंगळसूत्र तोडता आले नाही. परंतु ती महिला एकटी असल्याने प्रचंड घाबरली होती. चोरटा मात्र ओलांडामार्गे आगाशी रस्त्याने निघून गेला. या प्रकारामुळे आपल्या बाइकवर कामावर जाणाऱ्या महिलांमध्ये भीतीचे वातावरण आहे. त्यांना सकाळी असुरक्षित वाटत आहे. यामुळे ओलांडा चौकीवर रात्रीच्या वेळी पोलिस बंदोबस्त नसल्याने चोरांवर कोणताही धाक राहिला नाही. या पोलिस चौकीवर दिवस-रात्र बंदोबस्त ठेवण्यात यावा, अशी मागणी वसई जनआंदोलन समितीचे उपाध्यक्ष प्रा. विन्सेंट परेरा यांनी केली आहे. अर्नाळा सागरी पोलिस ठाण्याच्या पोलिस निरीक्षकांना याबाबत त्यांनी निवेदन नुकतेच सादर केले आहे.