रेल्वेरूळावर वृद्धाचा मृतदेह

कल्याण : डोंबिवली-ठाकुर्ली दरम्यान रेल्वेरूळावर ६९ वर्षीय ज्येष्ठ नागरिकाचा मृतदेह सापडला असून पोलिसांनी याप्रकरणी अपघाती मृत्यूची नोंद केली आहे. सेदुराम उन्नननादन पदाराम असे या ज्येष्ठ नागरिकाचे नाव आहे. दररोज या भागात फिरण्यासाठी येणारे सेदुराम काही वेळ रेल्वेपुलावर बसत असत. बुधवारीही संध्याकाळी ते असेच पुलावर बसले असता अचानक त्यांचा तोल जाऊन ते रेल्वे रुळावर पडले आणि त्यांचा मृत्यू झाल्याचे प्रत्यक्षदर्शिंनी सांगितले.

ठाकुर्ली परिसरात राहणारे सेदुराम पदाराम हे दररोज सायंकाळी ठाकुर्ली चोळे गावातील गणेशमंदिरात दर्शनासाठी येत. त्यानंतर डोंबिवली पूर्व-पश्चिमेला जोडणाऱ्या पादचारी पुलावर थोडा वेळ विरंगुळ्यासाठी थांबून परत जात. बुधवारी सायंकाळी साडेपाच वाजता ते पुलावर बसले होते. त्यांना अचानक चक्कर आल्याने तोल जाऊन पडल्याचे प्रत्यक्षदर्शिंनी सांगितले. रेल्वे पोलिसांनी त्यांचा मृतदेह शवविच्छेदनासाठी शास्त्रीनगर रुग्णालयात पाठवला.