सेल्फीने घेतला जीव

ओव्हरहेड वायरचा धक्का लागलेल्या मुलाचा मृत्यू

म. टा. वृत्तसेवा, अंबरनाथ

अंबरनाथ रेल्वे स्टेशनजवळ सेल्फी काढण्यासाठी मालगाडीवर चढल्यावर ओव्हरहेड वायरचा धक्का लागल्याने गंभीररित्या भाजलेल्या अनिकेत थोरात (१७) या मुलाचा शनिवारी केईएम रुग्णालयात उपचारादरम्यान मृत्यू झाला. लहानपणीच आईवडिलांचे निधन झाल्याने अंध आजी व बहिणीचा एकमेव आधार असलेल्या अनिकेतच्या निधनामुळे परिसरात हळहळ व्यक्त होत आहे.

अंबरनाथ पश्चिमेला गणेशनगर परिसरात अनिकेत थोरात हा आपली अंध आजी आणि लहान बहीण यांच्यासह राहत होता. अनिकेतच्या आईवडिलांचे तो लहान असतानाच निधन झाल्याने तोच अंध आजी आणि बहिणीचा एकमेव आधार होता. प्राथमिक शिक्षण पूर्ण केल्यानंतर अनिकेत एका ठिकाणी नोकरी करत होता. त्याच्याच पगारावर घर चालत होते. शुक्रवारी दुपारी अनिकेत मित्रांसह स्टेशन परिसरात आला. त्यावेळी बी केबीन परिसरात उभ्या असलेल्या मालगाडीवर जाऊन सेल्फी काढण्याची इच्छा त्याला झाली. त्यासाठी तो मालगाडीवर चढून सेल्फी काढू लागला. मात्र सेल्फी काढताना त्याचा स्पर्श रेल्वेच्या ओव्हरहेड वायरला झाल्याने तो गंभीररित्या भाजला. त्याच्या मित्रांनी त्याला जवळच्या बिजांकुर रुग्णालयात दाखल केले. मात्र प्रकृती गंभीर असल्याने त्याला मुंबईच्या केईएम रुग्णालयात हलविण्यात आले. मात्र अवघ्या चोवीस तासांतच त्याची प्राणज्योत मालवली.

या घटनेने अनिकेतची आजी आणि त्याच्या बहिणीवर आभाळ कोसळले आहे. लहानपणीच अनिकेतच्या आईवडिलांचे निधन झाले होते. त्यामुळे त्याची अंध आजी आलेल्या परिस्थितीशी झुंजत दोन्ही नातवंडांचा सांभाळ करत होती. नातू हाताशी आल्याने तिला काहीसा आधार मिळाला असतानाच, त्याचा मृत्यू झाल्याने हळहळ व्यक्त होत आहे.