अग्निशमन दलाची इमारत जमीनदोस्त

म. टा. वृत्तसेवा, अंबरनाथ

अंबरनाथ शहरातील धोकादायक इमारतींवर कारवाई करण्याबरोबरच अंबरनाथ पालिकेने स्वतःच्याच मालकीच्या दोन धोकादायक इमारती अखेर जमीनदोस्त केल्या. यात अंबरनाथ नगरपरिषदेचे अग्निशमन दल आणि अधीक्षक निवास अशा दोन धोकादायक इमारतींचा समावेश होता. या इमारतीमधील स्टील आणि इतर भंगार सामान विक्रीतून पालिकेला साधारण ७ ते ८ लाख रुपये मिळणार असल्याने इमारत पाडण्याचा खर्च पालिकेला आपल्या तिजोरीतून करावा लागणार नाही.

शहरात धोकादायक इमारतींची संख्या वाढत चालली असताना, पालिकेच्या दोन धोकादायक इमारतींचाही या यादीत समावेश होता. यातील १९७८ सालामध्ये बांधण्यात आलेल्या अंबरनाथ नगरपरिषदेच्या अग्निशमन दलाची इमारत आणि अधीक्षक निवास इमारत अनेक वर्षांपासून धोकादायक परिस्थितीत उभ्या होत्या. याच इमारतींमध्ये पालिकेचे काही विभागही सुरू होते. तसेच याच इमारतींमध्ये तळमजल्यावर विविध १२ दुकाने होती. नोटीस देऊनही धोकादायक इमारतीमधील ही दुकाने रिकामी करण्यास दुकानदार टाळाटाळ करत असल्याने अखेर पालिकेचे अतिक्रमण विरोधी पथक प्रमुख संदीप कांबळे आणि नरेंद्र संख्ये यांनी आपल्या कर्मचाऱ्यांसह जेसीबीच्या सहाय्याने सर्व प्रथम ही दुकाने रिकामी करून त्याच्या शेड तोडल्या. त्यानंतर या दोन्ही धोकादायक इमारती पालिकेने संबं​धित ठेकेदाराकडून जमीनदोस्त करून घेतल्याचे अतिक्रमण विभाग प्रमुख संदीप कांबळे यांनी सांगितले.