प्रशासनाच्या उदासीनतेमुळे खेडोपाडी गावठी दारु

म. टा. वृत्तसेवा, पालघर

जव्हार तालुक्यात ठिकठिकाणी गावठी दारुचा व्यवसाय सुरू आहे. ही गावठी दारू तयार करण्यासाठी लागणारा काळा गूळही बाजारात सहज उपलब्ध होत आहे. परिणामी शेकडो नागरिक व्यसनाच्या आहारी जाऊन मोठे नुकसान होत आहे. तहसीलदार, पोलिस प्रशासन, जव्हार नगर परिषद तसेच संबंधित प्रशासनाच्या उदासीनतेमुळे हा प्रकार घडत असल्याचा आरोप केला जात आहे.

राज्याची सीमा जवळच असल्याने दमण दारूची विक्रीही या भागात होते. शहरात व खेड्यापाड्यांत छोट्या-मोठ्या दुकानांत ही दारू सहज उपलब्ध होत आहे. पुरूषांबरोबरच महिलाही या गावठी दारुच्या आधीन गेल्याचे चित्र दिसत आहे. मात्र आजतागायत जव्हार पोलिस किंवा तहसील कार्यालयाकडून कुठलीही कारवाई करण्यात आलेली नाही.

स्थानिक संस्थांच्या मदतीने काही खेडोपाड्यांत जनजागृती करून ग्रामपंचायतीत ठराव करून काही गावांत दारूबंदी करण्यात आली आहे. परंतू अजूनही अनेक गावांत गावठी दारू व दमणची विषारी दारू सहज उपलब्ध होत आहे. त्यामुळे रहिवाशांमध्ये चिंतेचे वातावरण पसरले आहे.