अभ्यासिका निधीचा वाद सोशल मीडियावर

म. टा. वृत्तसेवा, उल्हासनगर

महानगरपालिकेच्या स्थायी समितीच्या बैठकीत डॉ. बाबासाहेब आंबेडकर अभ्यासिकेच्या ५ कोटींच्या वाढीव निधीवरून गुरुवारी शिवसेना शहरप्रमुख राजेंद्र चौधरी आणि पालिका उपायुक्त जमीर लेंगरेकर यांच्यात सोशल मीडियावर चांगलाच वाद रंगला. त्यामुळे शहरात दिवसभर या वादाचीच चर्चा होती.

उल्हासनगर शहरातील कॅम्प नंबर ३ येथील जवाहर हॉटेलजवळील महानगरपालिका शाळेच्या आवारात तीन मजली बहुउद्देशीय डॉ. बाबासाहेब आंबेडकर अभ्यासिकेचे काम मार्गी लागले आहे. नुकतेच स्थायी समितीच्या बैठकीत यासाठी ५ कोटी ३ लाख रुपयांचा निधी मंजूर करण्यात आला. हा प्रस्ताव स्थायी समितीच्या बैठकीत

सर्वानुमते मंजूर झाला. मात्र सत्ताधारी शिवसेनेचे शहरप्रमुख राजेंद्र चौधरी यांनी या निधीबाबत सोशल मीडियावर स्थायी समितीच्या कारभारावर टीका केली. डॉ. बाबासाहेब आंबेडकर अभ्यासिकेसाठी ३ कोटी ८ लाख रुपये अपेक्षित असताना ५ कोटी ३ लाख रुपये मंजूर करण्यात आले. याबाबतची माहिती चौधरी यांनी व्हॉट्स अॅप ग्रुपवर टाकली होती. त्यामुळे आपल्याच सभापती आणि अधिकाऱ्यांच्या कारभाराविरोधात त्यांनी प्रश्न उपस्थित केला होता.

अखेर यावर उल्हासनगर महानगरपालिकेचे उपायुक्त जमीर लेंगरेकर यांनी डॉ. बाबासाहेब आंबेडकर अभ्यासिकेबाबत स्पष्टीकरण दिले. विषयपत्रिकेतील घोषवारा बनवताना कर्मचाऱ्यांकडून ही चूक झाली होती. पूर्वीच्या शाळेच्या विषयाचा ३ कोटींचा निधी चुकून कॉपी झाला. मात्र डॉ. बाबासाहेब आंबेडकर अभ्यासिकेच्या ५ कोटींच्या निधीबाबत आणि टायपिंग चुकीबाबत स्थायी समितीत विषय संपला असल्याचे उपायुक्त लेंगरेकर यांनी सांगितले.