म. टा. वृत्तसेवा, कल्याण
कल्याण-डोंबिवली महापालिका क्षेत्रातील करोना रुग्णांना सेवा देण्यासाठी खासगी डॉक्टरांनी पालिकेच्या हातात हात देत कोविड रुग्णालयात मोफत काम करण्याची तयारी दाखवली होती. मागील दोन महिन्यांपासून हे डॉक्टर विविध रुग्णालयांत काम करत आहेत. मात्र खासगी रुग्णालयांना पालिका प्रशासनाने प्रत्येकी १० लाख रुपये देखभाल खर्च म्हणून दिला आहे. ही रुग्णालये रुग्णांकडून उपचार खर्चही वसूल करतात. त्यामुळे रुग्णालये पैसे घेत असतील, तर डॉक्टरांनी मोफत काम का करावे, असा प्रश्न उपस्थित केला जात आहे.
वाढत्या करोना रुग्णांच्या पार्श्वभूमीवर पालिका प्रशासनाने शास्त्रीनगर या कोविड रुग्णालयाबरोबरच पालिका क्षेत्रातील चार खासगी रुग्णालयांसोबत कोविड रुग्णालये म्हणून करार केला आहे. या रुग्णालयांना दरमहा १० लाख रुपये देण्यात येतात. शिवाय प्रत्येक रुग्णालयात महापालिकेचे १० कर्मचारी कार्यरत आहेत. या रुग्णालयांना रुग्णांकडून उपचार खर्च वसूल करण्यास परवानगी देण्यात आली असून त्याचे दर ठरवण्यात आले आहेत. आजपर्यंत नागरिकांना माहिती नसलेल्या रुग्णालयांना करोनाच्या निमित्ताने संजीवनी देण्याचा प्रशासनाचा हा प्रयत्न असल्याचा आरोप करत या रुग्णालयांत मोफत सेवा देणाऱ्या डॉक्टरांनी नाराजी व्यक्त केली आहे. रुग्णालये जर शुल्कआकारणी करत असतील तर डॉक्टरांनी मोफत सेवा का द्यावी, असा प्रश्न उपस्थित करण्यात येत आहे. आधीच पालिका रुग्णालयात अपुरे डॉक्टर असताना करोना सेवा देणाऱ्या डॉक्टरांची नाराजी पालिका प्रशासनाला परवडणारी नाही. यामुळे आयुक्त याबाबत काय निर्णय घेणार, याकडे सर्वांचे लक्ष लागले आहे.
दरम्यान कोविडसारख्या महामारीत स्वत:ची पर्वा न करता रुग्णसेवा करणाऱ्या डॉक्टरांना मानधन दिले जावे, अशी मागणी माजी आमदार नरेंद्र पवार यांनी पालिका आयुक्ताकडे केली होती. पालिका आयुक्तांनी या मागणीला सकारात्मक प्रतिसाद दिल्याचे पवार यांनी सांगितले, मात्र याची प्रत्यक्षात अमलबजावणी केव्हा होणार, याची निश्चित माहिती प्रशासनाकडून देण्यात आलेली नाही.