जिल्हा परिषद अखेर डिजिटल…

अद्ययावत अहवाल, ऑनलाइन तक्रार आणि योजनांची सखोल महिती

म. टा. प्रतिनिधी, ठाणे

ठाणे जिल्ह्यातील ग्रामीण भागातील जनतेला तत्काळ सेवा देण्याच्या उद्देशाने ठाणे जिल्हा परिषदेच्या वतीने सोमवारी अद्ययावत संकेतस्थळाचे लोकार्पण करण्यात आले. गतिमान व कार्यक्षम सेवा देण्याचा या वेबसाइटच्या निर्मिती मागचा मूळ हेतू आहे. त्यामुळे नागरिकांना योजनांची माहिती, दैनंदिन कामकाजाचे अपडेट आणि तक्रार करणेही सोपे या माध्यमातून मिळणार आहे. www.zpthane.maharashtra.gov.in असे हे संकेतस्थळ आहे. जिल्हा परिषदेच्या सर्वसाधारण सभेमध्ये अध्यक्षा मंजुषा जाधव यांनी या संकेतस्थळाचे उद्घाटन केले. यावेळी उपाध्यक्ष सुभाष पवार आणि मुख्य कार्यकारी अधिकारी विवेक भीमनवार उपस्थित होते.

जिल्हा परिषदेचे कामकाज अधिक गतिमान करून ग्रामीण भागातील जनतेच्या व गरजू लाभार्थींसाठी राबविण्यात येणाऱ्या योजनांचा प्रसार व प्रचार करण्यासाठी आवश्यक माहिती या संकेतस्थळावर प्रसारित करण्यात आली आहे. याचा उपयोग लाभार्थिंना योजनेचा उद्देश, पात्रता, मंजूर निधी, लाभ मिळवण्यासाठी अर्ज नमुने, अर्जाची सद्यस्थिती यांबाबतची माहिती जनतेस नवीन संकेतस्थळाच्या सहाय्याने विनाखर्चात प्राप्त होणे शक्य होणार आहे. या संकेतस्थळावर जिल्हा परिषदेचे सर्व पदाधिकारी, विषय समित्यांची रचना, जिल्हा परिषदेचे सदस्य त्यांची गट व गण निहाय पत्ते, संपर्क क्रमांक हे छायाचित्रासह उपलब्ध करून देण्यात आले आहेत. त्याचबरोबर ग्रामीण भागातील जनतेच्या तक्रारी ऑनलाइन पद्धतीने थेट व विनाखर्चात जिल्हा परिषदेच्या दरबारी मांडण्याची सुविधा आहे.