रुग्णाच्या नातेवाईकांची डॉक्टरला मारहाण

म. टा. वृत्तसेवा, वसई

विरार पूर्वेकडील आरूष खासगी रुग्णालयात उपचारादरम्यान रुग्ण दगावल्याने संतप्त झालेल्या रुग्णाच्या नातेवाईकांनी या रुग्णालयामधील डॉक्टर व त्यांच्या वॉर्डबॉयला बेदम मारहाण केली. या प्रकरणी विरार पोलिसांनी मंगळवारी गुन्हा दाखल केला आहे. पोलिस सीसीटीव्ही चित्रिकरणावरून माहिती काढत असून आरोपींना लवकरच अटक करू, असे पोलिसांनी सांगितले. रविवारी रात्री ही घटना घडली.

नालासोपारा पूर्वेकडील नगिनदासपाडा येथील रामकिशन यादव (६५) हे दम्यावरील उपचारासाठी आरूष रुग्णालयात दाखल झाले होते. रविवारी रात्री त्यांचा उपचारादरम्यान मृत्यू झाला. त्याची माहिती डॉक्टरांनी नातेवाईकांना दिली. यादव यांचा मुलगा व त्याच्या मित्रांनी मात्र संतापाच्या भरात रुग्णालयातील डॉक्टरांवर राग काढत डॉक्टरला मारहाण सुरू केली. या मारहाणीत डॉ. सुनील त्रिपाठी (४०) व वॉर्डबॉय विकास मोर्य (२३) जखमी झाले असून त्यांच्यावर रुग्णालयात उपचार सुरू आहेत. डॉक्टरांनी हलगर्जी केली तसेच, जास्त पैशांसाठी अडवणूक केल्याचे मृताच्या नातेवाईकांचे म्हणणे आहे. मात्र रुग्णालयाने सर्व आरोप फेटाळले आहेत.