जखमींकडून रुग्णालयांची बिलवसुली

उपचारखर्च उचलण्याच्या मुख्यमंत्र्यांच्या घोषणेला हरताळ

सानिका कुसूरकर, ठाणे

डोंबिवली स्फोटातील जखमींवरील उपचारांचा खर्च राज्य सरकार उचलेल, अशी घोषणा खुद्द मुख्यमंत्री देवेंद्र फडणवीस यांनी केल्यानंतरही तहसीलदारांच्या ‘आदेशा’वरून रुग्णालयांनी बिलवसुली सुरू केली आहे. डोंबिवलीच्या एम्स रुग्णालयाने तहसीलदारांच्या सांगण्यावरून रविवारी एका जखमीच्या कुटुंबीयांकडे दीड लाख रुपयांचे बिल भरण्यासाठी तगादा धरला.

मुख्यमंत्र्यांच्या जाहीर आश्वासनानंतरही स्फोट झालेल्या प्रोबेस कंपनीतील जखमी कर्मचारी अशोक चव्हाण यांच्या नातेवाईकांच्या हाती रविवारी सकाळी एम्स रुग्णालय प्रशासनाने दीड लाख रुपयांचे बिल देऊन ते तातडीने भरण्यास सांगितले. याविषयी ‘एम्स’चे व्यवस्थापक महेश पांचाळ म्हणाले की, ‘सुरुवातीचे दोन दिवस मोफत उपचार केले. त्यापैकी अनेकांना घरी सोडण्यात आले, मात्र आता रुग्णांकडून उपचारांचे पैसे घ्या, अशा सूचना तहसीलदार सर्जेराव म्हस्के पाटील यांनी दिल्या आहेत.

जखमींवर उपचार करणारी रुग्णालये बिलांची वसुली करीत असल्याच्या तक्रारी येत आहेत. याबाबत चौकशी सुरू आहे. मात्र रुग्णालय व्यवस्थापनांनी पैशासाठी रुग्णांची अडवणूक करू नये. कोणतीही आर्थिक अडचण असल्यास तहसीलदार कार्यालयाशी संपर्क साधावा.

- प्रसाद उकिर्डे, प्रांत अधिकारी