महिलेला ४६ हजारांना फसवले

कल्याण : महिलेला फोन करून तिच्याकडून क्रेडिट कार्डाची माहिती मिळवून तब्बल ४६ हजार रुपयांना गंडवल्याची घटना उघडकीस आली.

डोंबिवली पूर्वेकडील सारस्वत कॉलनीमधील भाग्योदय सोसायटीमध्ये राहणाऱ्या महिलेला ३० मे रोजी मोबाइलवर कॉल येऊन आपण बँकेतून बोलत असून तुम्हाला मिळालेले पॉइण्ट रिडीमशन करायचे असतील तर तुमच्या कार्डची माहिती द्या, असे सांगितले. तसेच, महिलेकडून त्यांच्या क्रेडिट कार्डाची माहिती मिळवत ऑनलाइन तीनवेळा व्यवहार करत २४ हजार ४६० रुपये लांबवले.

या महिलेने फोन कट केला असता पुन्हा फोन करून तुमचा व्यवहार पूर्ण न झाल्याने तुमचे पैसे परत मिळणार नाहीत, असे सांगत दुसऱ्या कार्डाची माहिती द्या, अशी थाप दिली. या भूलथापेला बळी पडत या महिलेने दुसऱ्या कार्डाची माहिती त्यांना दिली. त्यानंतर फोन वरून बोलणाऱ्या व्यक्तीने पुन्हा २१ हजार ८९२ रुपयांचा ऑनलाइन व्यवहार केला. फसवणूक झाल्याचे लक्षात येताच या महिलेने या प्रकरणी बुधवारी डोंबिवली पोलिस ठाण्यात तक्रार दाखल केली असून या तक्रारीनुसार पोलिसांनी गुन्हा दाखल केला आहे.