म. टा. वृत्तसेवा, कल्याण
रोटरी क्लब ऑफ डोंबिवली सनसिटी आणि क्राऊनसिटी यांच्यातर्फे डोंबिवलीमध्ये प्रथमच कपूर परिवाराच्या चार पिढ्यांची अनोखी म्युझिकल सफर आपल्यासमोर सादर होणार आहे. पृथ्वीराज कपूरपासून ते आजच्या रणबीर कपूरपर्यंत सर्व कलाकारांनी सिनेसृष्टीला एक अनोखे योगदान दिले आहे. त्यांच्या प्रसिद्ध गाण्यांचा आविष्कार शनिवार, २३ नोव्हेंबर रोजी, रात्री ९.१५ वाजता, सावित्रीबाई फुले कलामंदिर, डोंबिवली पूर्व येथे सादर होणार आहे.
संगीत क्षेत्रातील प्रसिद्ध गायक कलाकार सर्वेश मिश्रा, किशोर पराशर, राजेश पंड्या, शोएब अहमद, शिल्पा मालंडकर यांसोबत सारेगमप विजेते चिराग पांचाळ गायन आणि संगीत संयोजनाची दुहेरी धुरा सांभाळणार आहे. एकंदर १३ ते १५ वादक यामध्ये सहभागी होणार आहेत. कार्यक्रमाचे सूत्रसंचालन प्रसिद्ध रेडियो जॉकी मंदार खराडे करणार आहेत. 'कपूर - म्युझिकल शो'च्या माध्यमातून जमा होणार निधी हृदयाला छिद्र असणाऱ्या लहान मुलांच्या शस्त्रक्रियेसाठी, गरजू मुलांसाठी दुपारच्या पौष्टिक जेवणाची सोय व्हावी यासाठी तसेच सामाजिकदृष्ट्या मागासलेल्या कुटुंबांना मदतीचा हात देण्यासाठी वापरण्यात येणार आहे.
कार्यक्रमाच्या आयोजनात रोटरी क्लब ऑफ डोंबिवली सनसिटीचे सचिव तसेच क्लब फाउंडर अजय जैन, क्लबचे अध्यक्ष ओंकार दाहोत्रे आणि रोटरी क्लब ऑफ डोंबिवली क्राऊनसिटीचे अध्यक्ष स्वप्नील गायकर, सचिव विनायक गुर्जर यांचा मोलाचा वाटा आहे. कार्यक्रमाचे सहआयोजक जे. के. सिक्स सेन्सेस प्री-स्कूल आणि एस. एम. जी. विद्यालय, पाणीदेवी रामरतन जैन ट्रस्ट, डोंबिवली हे आहेत. वाद्यवृंद आणि समन्वय, प्रारंभ फाउंडेशनच्या दिलीप गुप्ते यांनी केले आहे. प्रसिद्ध इलेक्ट्रिक केबल कंपनी आर. आर. केबल, डेली शॉप व उषा एजन्सी यांच्याकडून सढळ हस्ते मदत लाभली आहे. पर्यावरण दक्षता जागृती म्हणून प्रेक्षकांना कार्यक्रमाचे ई-तिकीट व्हॉट्सअॅपवर उपलब्ध करून दिले जाणार आहे. सर्व रसिक प्रेक्षकांनी दिलेल्या क्रमांकावर व्हॉट्सअॅप करून तिकीट त्वरित बुक करण्याचे आवाहन करण्यात आले आहे. संपर्क : अजय जैन : ९३२०३०२०११.
कधी : २३ नोव्हेंबर २०१९
कुठे : सावित्रीबाई फुले कलामंदिर डोंबिवली (पूर्व)
केव्हा : रात्री ९:१५ वाजता