अण्णासाहेब वर्तक कॉलेजच्या मराठी वाङ्मय मंडळाचे उद्घाटन
म. टा. वृत्तसेवा, वसई
मराठी भाषा आणि वाङ्मयाच्या अभिवृद्धीसाठी सरकार आणि राजकीय नेत्यांवर अवलंबून न राहता मराठीचे विद्यार्थी आणि शिक्षकांनीच प्रयत्नशील राहण्याची गरज आहे, असे प्रतिपादन विरार येथील संत जोसेफ कॉलेजचे मराठी विभागप्रमुख आणि राष्ट्रीय सेवा योजनेचे पालघर जिल्हा समन्वयक प्रा. जगदीश संसारे यांनी वसईत आयोजित कार्यक्रमात केले.
वसई येथील अण्णासाहेब वर्तक कॉलेजच्या मराठी वाङ्मय मंडळाचा उद्घाटन समारंभ विद्यावर्धिनी शिक्षणसंस्थेचे उपाध्यक्ष बबनशेठ नाईक यांच्या अध्यक्षतेखाली झाला. विरार येथील संत जोसेफ कॉलेजचे मराठी विभागप्रमुख आणि राष्ट्रीय सेवा योजनेचे पालघर जिल्हा समन्वयक प्रा. जगदीश संसारे हे या कार्यक्रमाला उद्घाटक आणि प्रमुख पाहुणे म्हणून उपस्थित होते. कॉलेजचे प्राचार्य डॉ. संतोष शेंडे, उपप्राचार्य डॉ. अनिलकुमार शेळके यांच्या प्रमुख उपस्थितीत झालेल्या या कार्यक्रमाला कॉलेजमधील प्राध्यापक आणि मराठीप्रेमी विद्यार्थ्यांचा मोठा प्रतिसाद लाभला.
मराठी विभागाचे प्रमुख डॉ. शत्रुघ्न फड यांनी प्रारंभी मराठी वाङ्मय मंडळाच्या उपक्रमामागील भूमिका विशद केली. डॉ. सखाराम डाखोरे यांनी वर्षभरात मराठी विभाग आणि मराठी वाङ्मय मंडळातर्फे आयोजित केल्या जाणाऱ्या विविध उपक्रमांची उपस्थित विद्यार्थ्यांना ओळख करून दिली. मराठी वाङ्मय मंडळाच्या विद्यार्थ्यांनी अण्णा भाऊ साठे यांच्या जन्मशताब्दीनिमित्त तयार केलेल्या 'प्रेरणा' भित्तीपत्रकाचे प्रकाशनही यावेळी झाले. मराठी वाङ्मय मंडळाचा विद्यार्थी रामकृष्ण माने याने अण्णा भाऊ साठे यांचे जीवन, कार्य आणि त्यांच्या साहित्यसंपदेचा परिचय थोडक्यात करून दिला.
विद्यार्थ्यांनी प्रशासनाशी करायचा विविध प्रकारचा पत्रव्यवहार तसेच अर्जलेखन यात कटाक्षाने मराठीचा वापर करावा, असा संकल्प करावा, असे आवाहन कॉलेजचे उपप्राचार्य डॉ. अनिलकुमार शेळके यांनी विद्यार्थ्यांना केले. कार्यक्रमाचा अध्यक्षीय समारोप करताना बबनशेठ नाईक यांनी मराठीच्या विविध बोलींचे वैविध्य, समृद्धी आणि आंतरिक सौंदर्य अभ्यासनीय आहे, असे सांगितले. कार्यक्रमाचे सूत्रसंचालन डॉ. सखाराम डाखोरे यांनी केले, तर प्रा. शैलेश औटी यांनी आभारप्रदर्शन केले.