मलवाहिनी जोडणीसाठी मोजा चार हजार रुपये

कल्याण : महापालिका क्षेत्रातील इमारतीची मलवाहिनी मुख्य मलवाहिनीला जोडण्यासाठी प्रत्येक सदनिकेसाठी चार हजार रुपये शुल्क आकारण्यात येत आहे. हे शुल्क अवाजवी असल्याचे सांगत त्यात कपात करण्यात यावी, अशी मागणी सभागृह नेता राजेश मोरे यांनी केली आहे.

कल्याण-डोंबिवली महापालिका क्षेत्रातील इमारतीच्या मलवाहिन्या गटाराला जोडलेल्या असल्यामुळे हे सांडपाणी गटारातून वाहून जात होते. मात्र आता हे सांडपाणी भूमिगत मलनि:सारण वाहिन्यांमधून पालिकेच्या मुख्य वाहिनीद्वारे मलशुद्धीकरण केंद्रापर्यंत नेले जाणार असून यासाठीच्या मलवाहिन्या टाकण्याचे काम सुरू करण्यात आले आहे. मुख्य मलवाहिन्या इमारतीच्या मलवाहिन्यांना जोडण्यासाठीचा प्रत्येक सदनिकेला ४००० रुपये दर आकारला जाणार आहे. मात्र या शुल्कात कपात करण्याची मागणी मोरे यांनी केली आहे.