म. टा. वृत्तसेवा, ठाणे
भाडेतत्त्वावर प्रवाशांची ने-आण करणाऱ्या नालासोपाऱ्यातील कारचालकाला त्याच्याच गाडीमध्ये कोंबून जबर मारहाण करत चौघांनी लुटल्याची घटना ठाण्यात समोर आली आहे. कारमधून घेऊन जात असताना या चालकाने कसारा घाटात कारमधून उडी घेत आरोपींच्या तावडीतून स्वतःची सुटका केली असून याप्रकरणी कापूरबावडी पोलिस ठाण्यात गुन्हा दाखल करण्यात आला आहे.
विमलेशकुमार रामदिन गुप्ता (२२) हा नालासोपारा येथील ओमसाई गुरू अपार्टमेंटमध्ये राहतो. तो एका कारवर चालकाचे काम करत असून ही कार ओला आणि उबेर या कंपनीशी संलग्न आहे. ३१ मार्च रोजी रात्री साडेअकरा वाजता तो अंधेरी येथून भाडे घेऊन ठाण्यात आला होता. माजीवाडा येथे भाडे सोडल्यानंतर त्याठिकाणी कार पार्क करून त्याने जेवण केले आणि मध्यरात्री एकच्या सुमारास तो जात असताना त्याठिकाणी आलेल्या २० ते २५ वर्षे वयोगटातील चौघांनी मुंब्रा येथे आम्हाला सोड असे त्याला सांगितले. मात्र विमलेशने नकार देताच या टोळक्याने त्याला मारहाण करण्यास सुरुवात केली. तसेच, कारची चावी घेऊन त्याला कारच्या पाठीमागील सीटखाली तोंडात बोळा कोंबून बसवले. त्याला कारमध्ये दगडाने, पेनाने आणि तीक्ष्ण हत्याराने मारहाण करत पळवून नेले. तसेच आरोपींनी पाच हजाराची रोकड, घड्याळ, एटीएम कार्ड, पॅनकार्ड, आधारकार्ड आदी ऐवजही काढून घेतला. कार कसारा घाटात आल्यानंतर कारचा वेग कमी झाल्याने विमलेशने कारमधून उडी मारली आणि आरोपींच्या तावडीतून सुटका केली. त्याच्या आवाजाने जवळच मंदिरात झोपलेले साईभक्त जागे झाले. साईभक्तांना त्याने घडलेला प्रकार सांगितल्यानंतर त्यांनी इगतपुरी पोलिसांना माहिती दिली. तेथे आलेल्या पोलिसांनी विमलेशला सिव्हिल रुग्णालयात दाखल केले. मात्र नंतर नाशिकमधीलच खासगी रुग्णालयात त्याला हलवले असून सध्या त्याठिकाणी आयसीयूमध्ये त्याच्यावर उपचार सुरू आहेत.
आरोपींनी कारसह एकूण ६ लाख १५ हजार रुपयांचा ऐवजाची चोरी केली असून सुरुवातीला इगतपुरी पोलिस ठाण्यात गुन्हा दाखल करण्यात आला होता. मात्र नंतर हा गुन्हा कापूरबावडी पोलिस ठाण्यात वर्ग करण्यात आला असून याप्रकरणी पोलिसांचा तपास सुरू आहे.