VIDEO: नशेखोर तरुणानं दोरीवर लटकत फोडली हंडी; खासदार श्रीकांत शिंदेच्या समोर घडला प्रकार

उल्हासनगर: शिंदे गटाचे कट्टर समर्थक अरुण अशान यांच्या दहीहंडी उत्सवात एक अनुचित प्रकार घडला आहे. इथे दहीहंडी फोडण्यासाठी आलेल्या गोविंदा पथकांच्या अगोदरच एका नशेखोर तरुणाने उंच असलेल्या दहीहंडीच्या दोरीवर लटकत येत दहीहंडी फोडली. उल्हासनगरच्या नेताजी चौक परिसरात हा प्रकार घडला.

उल्हासनगर कॅम्प ५ मधील नेताजी चौकात स्वर्गीय लक्ष्मण आशान यांच्या स्मृतीप्रित्यर्थ जय भवानी मित्र मंडळाने ५५ हजार ५५५ रुपये बक्षिसाच्या हंडीचे आयोजन केले होते. या हंडीला खासदार श्रीकांत शिंदे यांनी उपस्थिती लावली. तत्पूर्वी पावणे अकरा वाजताच्या सुमारास एक तरुण दहीहंडीची दोरी बांधलेल्या मनोऱ्यावर चढला. तेथून दोरीवरून लटकत येऊन हंडी फोडली. यावेळी दोरी ढिल्ली करून हंडी फोडणाऱ्याला खाली उतरवण्यात आले. तेव्हा सहाय्यक पोलीस आयुक्त जगदीश सातव, वरिष्ठ पोलीस निरीक्षक मधुकर कड, रणजित ढेरे, संजय गायकवाड यांच्या पथकाने तरुणाला तात्काळ ताब्यात घेतले. भोला वाघमारे(२२) असे या तरुणाचे नाव असून तो बेघर आहे.
थरामुळे नाही तर मुख्यमंत्री शिंदेंची दहीहंडी राज्यभरात चर्चेत, बघा काय आहे कारण...
दहीहंडी फोडल्यानंतर हा तरुण उंचावरून खाली पडून बरं वाईट घडण्याची शक्यता होती. त्यामुळे तरुणाने दहीहंडी फोडल्यानंतर आयोजकांनी हंडीची दोरी खाली घेतली. त्यामुळे तरुणाचा जीव वाचला. नशेखोर तरुणाला हिल लाईन पोलिसांनी ताब्यात घेतले आहे. या सगळ्या प्रकारामुळे गर्दीमध्ये एकच खळबळ उडाली होते. विशेष म्हणजे खासदार श्रीकांत शिंदे या दहीहंडी उत्सवाला उपस्थित असताना हा सगळा प्रकार घडला.