अंमली पदार्थांचा साठा जप्त

कल्याण : ठाणे जिल्ह्यात गर्द-चरस-गांजाची विक्री करणाऱ्या तस्करांचे कंबरडे मोडण्यासाठी कल्याण-डोंबिवलीतील काही तरुणांनी पुढाकार घेतला आहे. मंगळवारी रात्री या तरुणांनी कल्याण-शिळ मार्गावर असलेल्या नेतीवली येथील होमबाबा टेकडीवर पोलिसांच्या मदतीने एका घरावर अचानक छापा टाकला. यावेळी एक हस्तक त्यांच्या हाती लागला असून त्याच्याकडून तब्बल १ किलो १० ग्रॅम वजनाचा गांजा जप्त करण्यात आला. या टोळीचा म्होरक्या सलीम इस्माईल शेख मात्र पसार झाला.

कल्याणपासून काही किमी अंतरावर असलेल्या नेतीवली येथे होमबाबा टेकडी आहे. या टेकडीवर बाबामियाँ चाळीतील एका खोलीत अंमली पदार्थांची तस्करी वजा विक्री सुरू असल्याची माहिती तरुणांचा पथकप्रमुख वैभव राणे याला मिळाली होती. त्यानुसार २० तरुण व १८ पोलिसांनी मंगळवारी रात्री दहाच्या सुमारास येथे छापा टाकला.

या अड्ड्याचा म्होरक्या सलीम शेख अंधाराचा फायदा घेऊन तेथून निसटला. मात्र त्याचा साथीदार प्रकाश उर्फ पक्या बाबू सोनी (२२) हाती लागला. या खोलीतून १ किलो १० ग्रॅम वजनाचा गांजा, चिलीम आणि काही रक्कम असा ७ हजार ५३५ रुपये किंमतीचा मुद्देमाल जप्त करण्यात आला. सोनीला तीन दिवसांची पोलिस कोठडी सुनावली आहे.