एकदंत थिएटर्स संस्थेतर्फे आयोजन
म. टा. प्रतिनिधी, ठाणे
करोनाचे संकट दिवसेंदिवस वाढत असल्याने राज्यात संचारबंदी लागू करण्यात आली आहे. त्यामुळे साडेतीन मूहुर्तांपैकी एक असलेला गुढीपाडवा साजरा करण्यासाठी बुधवारी नागरिक घरातून बाहेर पडू शकणार नाहीत. करोनामुळे गुढीपाडव्यानिमित्त दरवर्षी होणारे कार्यक्रम अगोदरच रद्द करण्यात आल्याने यंदाच्या गुढीपाडव्यावर करोनाचे सावट आहे. मात्र, गुढीपाडव्याच्या दिवशी घरबसल्या मनोरंजन व्हावे, यासाठी ठाण्यातील एकदंत थिएटर्स संस्थेतर्फे 'डिजिटल' गुढीपाडवा हा अनोखा कार्यक्रम करण्यात येणार आहे. कविता, पोवाडे, कथक नृत्य, तबला, ढोलकी वादन आदी विविध कार्यक्रमांचे व्हिडिओ बुधवारी सकाळी १० ते रात्री ९ वाजेपर्यंत संस्थेच्या फेसबुक पेजवर अपलोड करण्यात येणार आहेत.
गुढीपाडव्यानिमित्त दरवर्षी विविध शहरांत होणारे कार्यक्रम अगोदरच रद्द करण्यात आले आहेत. तसेच, नागरिकांनाही संचारबंदीमुळे घरातल्या घरातच गुढीपाडवा साजरा करावा लागणार आहे. नातेवाईकांच्या घरीही जाता येणार नाही. मात्र, घरातून बाहेर पडता येत नसले तरी नागरिकांना गुढीपाडव्याच्या दिवशी ऑनलाइन विविध कार्यक्रमांचा आस्वाद घेता येईल. मागील दोन वर्षांपासून 'डिजिटल दिवाळी पहाट२ची संकल्पना राबवणारे ठाण्यातील एकदंत थिएटर्सचे दिव्येश बापट यांनी 'डिजिटल गुढीपाडवा' ही संकल्पना पुढे आणली आहे.
घरबसल्या संस्थेच्या फेजबुक पेजवर रसिकांना विविध कार्यक्रम पाहता येतील, असे त्यांनी 'मटा'ला सांगितले. या माध्यमातून लोकांचा वेळ सत्कारणी लागावा आणि मनोरंजनही व्हावे, हा यामागचा उद्देश असल्याचे बापट यांचे म्हणणे आहे. घरात बसून कंटाळा येतो. हा कंटाळा काहीसा दूर करण्यासाठी डिजिटल गुढीपाडव्याचा हा उपक्रम आहे. सुरुवातीला फेसबुक पेजवर कार्यक्रम लाइव्ह करण्याचा विचार होता. मात्र सध्याची परिस्थिती बघता 'लाइव्ह'ऐवजी अर्ध्या तासाचे कार्यक्रमाचे व्हिडीओ संस्थेच्या फेसबुक पेजवर बुधवारी अपलोड केले जातील. सकाळी १० वाजल्यापासून ते रात्री नऊ वाजेपर्यंत वेगवेगळे व्हिडिओ अपलोड होतील. कलाकार त्यांच्या घरातूनच कार्यक्रमाचे व्हिडिओ मोबाइलद्वारेच तयार करतील. त्यानंतर ते व्हिडीओ मला पाठवल्यानंतर पुढे मी फेसबुकवर शेअर करेन, असेही त्यांनी सांगितले.