रस्त्याच्या कडेला कचऱ्याचे ढीग

म. टा. वृत्तसेवा, अंबरनाथ

शहरातील घनकचरा उचलण्यासाठी नेमण्यात आलेल्या नवीन कंत्राटदाराकडून नियमांचे उल्लंघन केले जात असल्याचे समोर आले आहे. कंत्राटदार एमआयडीसीकडे जाणाऱ्या मुख्य मार्गाच्या बाजूलाच कचरा जमा करत असून नंतर तो डम्पिंग ग्राउंडवर नेला जातो. यामुळे या मार्गावरून जाणाऱ्या प्रवाशांना दुर्गंधीचा सामना करावा लागत आहे.

अंबरनाथ नगरपरिषदेने काही महिन्यांपासून शहरातील कचरा उचलण्यासाठी ठाण्याच्या समीक्षा कंपनीला कंत्राट दिले आहे. साधारण वर्षाकाठी शहरातील १२० मे. टन कचरा उचलण्यासाठी १७ कोटी रुपये या कंत्राटदाराला पालिकेने अदा करायचे आहेत. या कामासाठी काम सुरू झाल्यापासून तीन महिन्यांत कचरा उचलण्यासाठी नवीन बंदिस्त गाड्या व १५ जुलैपर्यंत शून्य कचरा करण्याचे आश्वासन संबंधित कंत्राटदाराने दिले. तरी सध्या कचरा उचलण्यासाठी खुल्या गाडीतून कचरा वाहतूक करण्यात येत आहे. कचरा अंबरनाथ पूर्व भागातील लोकनगरी पुलाजवळ रस्त्याच्या कडेला टाकण्यात येतो. नंतर येथून दुसऱ्या गाडीने तो डम्पिंग ग्राउंडपर्यंत नेण्यात येतो. त्यामुळे या ठिकाणी कायम कचरा दिसून येत आहे.

कंत्राटदार अनेक अटी व शर्तीचा भंग करीत असल्याची तक्रार नगरसेवक सुनिल सोनी यांनीही पालिकेच्या मुख्याधिकारी गणेश देशमुख यांच्याकडे केली आहे. याबाबत

पालिकेतील आरोग्य अधिकारी सुरेश पाटील यांना विचारले असता, संबंधित कंत्राटदार एका ठिकाणी कचरा जमा करून नंतर तो डंम्पिंग ग्राउंडवर घेऊन जातो. मात्र हे काम शहराच्या मुख्य रस्त्यावर होत असल्याने येत्या दोन दिवसांत ते बंद करण्यास आम्ही सांगितले आहे.