पालघरमध्ये भूकंपतज्ज्ञ दाखल

म. टा. वृत्तसेवा, पालघर

पालघर जिल्ह्यातील डहाणू, तलासरी तालुक्यांत गेले दोन महिने वारंवार बसणाऱ्या भूकंपाच्या धक्क्यांमागील कारणे शोधण्यासाठी केंद्रातील भूगर्भतज्ज्ञांचे पथक तलासरी येथील धुंदलवाडीत दाखल झाले आहे.

इंडियन मेट्रोलॉजिकल विभागाच्या मुंबई व दिल्लीतील भूगर्भतज्ज्ञांचा या पथकामध्ये समावेश आहे. यामध्ये कमलेश चौधरी (आयएमडी दिल्ली), किरण नरखेडे (आयएमडी मुंबई) आणि पालघर जिल्हाधिकारी कार्यालयातील विवेकानंद कदम हे तज्ज्ञ सहभागी झाले आहेत. तलासरी, डहाणू तालुक्यात आतापर्यंत २.७ ते ३.४ तीव्रतेच्या आठ ते नऊ वेळा भूकंपाच्या नोंदी तर, शेकडो सौम्य धक्के जाणवल्याने नागरिकांमध्ये भीतीचे वातावरण आहे. यामुळे या परिसरात भूकंपमापन यंत्रणा बसविण्यासाठी दिल्ली येथून तज्ज्ञांचे पथक आले असून, त्याने धुंदलवाडी येथील वेदांत रुग्णालय आणि नरेशवाडी येथील के. जे. सोमय्या माध्यमिक विद्यालय या दोन स्थळांची पाहणी केली. तलासरी,डहाणू तालुक्याच्या परिसरातील गावांमध्ये गेल्या दोन महिन्यांपासून सुरू असलेल्या भूकंपाच्या धक्क्यांचा नागरिकांनी धसका घेतला असून, यामुळे अनेक घरांना तडे गेले आहेत. गावपाड्यातील अनेक जण भूकंपाच्या भयाने स्थलांतर करू लागले आहेत, तर काही जण घराबाहेर सुरक्षित स्थळी तंबू ठोकून रात्र काढत आहे.

आज बसवणार मापकयंत्र

भूकंपामागील कारणे व केंद्रबिंदूची माहिती मिळत नसल्याने प्रशासनाने परिपूर्ण माहिती मिळविण्यासाठी हवामान विभागातील पथकाला या परिसरात पाठविले आहे. भूकंपमापक यंत्रसामुग्री बसविण्यासाठी पाहणी केलेल्या स्थळांवर आज, गुरुवारी यंत्र बसविले जाणार असून, त्यानंतरच भूकंपामागील माहिती समोर येण्याची शक्यता आहे. ज्या ठिकाणी पथकामार्फत आवश्यक भूकंपमापक यंत्र बसविण्यात येणार आहे, त्या ठिकाणी २४ तास इंटरनेट सुविधा व वीजसेवा उपलब्ध असली पाहिजे. तसेच हा परिसर शांत आणि निर्मनुष्य असणे आवश्यक आहे, असे तज्ज्ञांकडून सांगण्यात आले.