भूकंपाने घरांना तडे

म. टा. वृत्तसेवा, पालघर

पालघर जिल्ह्यातील तलासरी, डहाणू तालुक्यांत गेल्या काही दिवसांपासून भूकंपाचे धक्के बसत असून, शनिवारी २. ५५ मीनिटांनी व त्या नंतर पहाटे ३.४७ मिनिटांनी भूंकपाचा अधिक तीव्रतेचे धक्का या भागांत जाणवला. या धक्क्यांमुळे काही घरांना तडे गेल्याचे सांगण्यात येत आहे. किती प्रमाणात नुकसान झाल्याची महिती अजून हाती आली नसली या भूकंपांमुळे आदिवासी पट्ट्यात भीतीचे वातावरण पसरले आहे.

तालासरीतील सवणे गावातील लालू वेडगा, भरत वेडगा, जयवंत धोदडे यांच्या घरांना मोठे तडे गेले असल्याची माहिती उपसरपंच सुनील टोकरे यांनी दिली. करजगावाचे सरपंच लुईस काकड यांनीही गावातील काही घरांना तडे गेल्याची माहिती दिली. डहाणू तालुक्यातील धुंदलवाडी, वंकास, दापचारी यांच्यासह वडवली, करजगाव, तलासरी ते गुजरात सीमेवरील कोचाई उपलाट गावालाही भूकंपाचा धक्का बसला. धुंदलवाडी गावातील लोक तर भीतीने घराबाहेरच राहिले असल्याचे सांगण्यात आले.

दापचरी येथील वेदांत रुग्णालयात दाखल झालेले रुग्णही भूकंपाच्या धक्क्याने रुग्णालयाबाहेर पडले. ते पुन्हा आत जाण्यास तयार नव्हते. दापचरीतीलच हुसेन शेख यांच्या घराला मोठा तडा गेला असून घराचे नुकसान झाले आहे.

शासकीय यंत्रणेला कल्पनाच नाही

या भूकंपाची डहाणू व तलासरी येथील महसूल अधिकाऱ्यांना कल्पनाही नव्हती. पत्रकारांनी निवासी जिल्हाधिकाऱ्यांना अधिक माहितीसाठी फोन केला तेव्हा त्यांनी संबंधित यंत्रणेकडे विचारणा केल्यावर सरकारी यंत्रणेला जाग आली.