बाप्पा होतोय ‘इको फ्रेंडली’

ठाण्यातील विविध संस्थांकडून गणपती कार्यशाळा

म. टा. वृत्तसेवा, ठाणे

गेल्या काही वर्षांपासून विविध लोकप्रिय सणांनी ‘इव्हेंट’चे रूप धारण केलेले असताना, आता जेमतेम महिन्यावर येऊन ठेपलेल्या गणेश उत्सवाचीही तीच अवस्था आहे. मात्र गणेशोत्सव पर्यावरणस्नेही पद्धतीने साजरा करण्यासाठी विविध सामाजिक संस्थांनी शहरवासियांना आवाहन केले आहे. अधिकाधिक भाविकांनी इकोफ्रेंडली बाप्पाची स्थापना करावी, यासाठी सामाजिक, पर्यावरणवादी संस्थांनी आग्रह धरला असून यासाठी ठिकठिकाणी इकोफ्रेंडली गणेशमूर्तींच्या कार्यशाळा घेण्यात येत आहेत.

गणेशोत्सव सार्वजनिक आणि घरगुती पद्धतीने मोठ्या आनंदात, उत्साहात आणि भक्तिभावाने साजरा केला जातो. वर्षागणिक घरगुती, सार्वजनिक गणेशोत्सवात वाढ होताना दिसत आहे. सामान्यतः नागरिक प्लॅस्टर ऑफ पॅरिसचा वापर करून तयार केलेल्या गणेशमूर्ती घेतात. मात्र पीओपी पर्यावरणासाठी हानिकारक असल्याने शाडूपासून घडवलल्या गणेशमूर्तींसाठी पर्यावरणवादी संस्था जागरुकता निर्माण करत आहेत.

ठाण्यातील पर्यावरण दक्षता मंडळ, संस्कारभारती, रोटरी क्लब ऑफ बदलापूर इंडस्ट्रिअल एरिया आदी संस्थांनी यंदा पर्यावरणस्नेही अर्थात इकोफ्रेंडली गणपती उत्सव साजरा करण्यासाठी इकोफ्रेंडली गणेशमूर्ती कार्यशाळा आयोजित केल्या आहेत. या कार्यशाळांच्या माध्यमातून शाडूच्या मातीपासून गणेशमूर्ती तयार करण्याचे प्रशिक्षण नागरिकांना देण्यात आले. पर्यावरण दक्षता मंडळाच्या वतीने ‘आपला गणपती आपणच तयार करा’ अशी अभिनव संकल्पना गेल्या अनेक वर्षांपासून राबवली जात आहे.

यावर्षी ठाणे तसेच मुंबई, कल्याण, आणि डोंबिवलीतील विविध शाळा, कॉलेजे, गृहसंकुले अशा विविध ठिकाणी पर्यावरणस्नेही गणपतींच्या कार्यशाळा घेण्यात आल्या. ठाणे शहरातील प्रकृती सोसायटीनेही शाडूच्या मातीपासून गणपती तयार करण्याची कार्यशाळा आयोजित केली आहे.