गेल्या तीन वर्षांत २२८४ लाभार्थी, २ कोटी २९ लाखांचे वाटप
म. टा. वृत्तसेवा, ठाणे
मुलींच्या जन्मदरांत वाढ व्हावी, तसेच स्त्री भ्रूण हत्येला लगाम बसावा, यासाठी तीन वर्षांपासून ठाणे महापालिका मुलींच्या जन्माचे स्वागत करण्याचा प्रयत्न करत आहे. राजकन्या या योजनेतून मुलगी जन्मल्यावर तिच्या सर्वांगीण विकासासाठी आर्थिक मदत केली जात असून आतापर्यंत २२८४ लेकींना लाभ देण्यात आला आहे. या योजनेसाठी २ कोटी २९ लाख रुपये खर्च केले आहेत.
ठाणे महापालिकेच्या हद्दीत जन्माला आलेल्या मुलीच्या पूरक पोषणासाठी आणि प्राथमिक शिक्षणासाठी आर्थिक मदत व्हावी, यासाठी महापालिकेच्या महिला व बालकल्याण योजनेअंतर्गत तीन वर्षांपासून राजकन्या योजना राबविली जात आहे. या योजनेचा आतापर्यंत २,२८४ जणांना लाभ देण्यात आला. यासाठी २ कोटी २९ लाख रुपयांच्या निधीची तरतूद करण्यात आली. आलेल्या अर्जांपैकी लॉटरी पद्धतीने कुटुंबीयांची निवड केली जात असून त्यानुसार त्यांना लाभ दिला जात आहे.
महापालिकेच्या हद्दीतील मुलींचा जन्मदर वाढावा, मुलींच्या राहणीमानाचा दर्जा उंच व्हावा, स्त्री-भ्रूण हत्येला लगाम बसावा, कुपोषणाचे प्रमाण कमी व्हावे, मुलींचा शारीरिक विकास व्हावा, मुलींकडे पाहण्याच्या समाजाच्या दृष्टिकोनात बदल घडावा, या उद्देशाने राजकन्या योजना राबविली जात आहे. लॉटरी पद्धतीने या योजनेचा लाभ दिला जात असल्यामुळे अनेक लाभार्थी या योजनेपासून वंचित राहत आहेत. यावर्षी १,६५७ अर्ज गेले असून त्यापैकी ८२४ लाभार्थींना लाभ देण्यात येणार आहे. येणाऱ्या अर्जांपैकी निम्म्याहून अधिक लोकांना या योजनेचा लाभ मिळत नाही. गेल्या तीन वर्षांत २२८४ कुटुंबीयांना प्रत्येकी २० हजारांची मदत करण्यात आली.
दृष्टिक्षेप
वर्ष लाभार्थी खर्च
२०१७ ४५० ६७ लाख ५० हजार
२०१८ १०१० १ कोटी ५९ लाख ५३ हजार
२०१९ ८२४ -