देशभरात १० हजार बस सुरू करणार
प्रकाश जावडेकर यांची माहिती
नवी मुंबईमध्ये वर्षभरात आणखी १०० इलेक्ट्रिक बस
म. टा. वृत्तसेवा, नवी मुंबई
पर्यावरण रक्षणासाठी इलेक्ट्रिक वाहनांचा वापर वाढविण्याच्या दृष्टीकोनातून देशभरात सार्वजनिक वाहतूक उपक्रमात १० हजार इलेक्ट्रिक बस सुरू करण्याचा केंद्र सरकारचा प्रयत्न असल्याची माहिती केंद्रीय पर्यावरणमंत्री प्रकाश जावडेकर यांनी दिली. नवी मुंबई महानगरपालिकेने केंद्र सरकारच्या योजनेतून ३० इलेक्ट्रिक बस खरेदी केल्या आहेत. पुढील वर्षभरात आणखी १०० इलेक्ट्रिक बसेस घेतल्या जाणार आहेत.
भाजपच्या राज्य अधिवेशनासाठी प्रकाश जावेडकर नवी मुंबईमध्ये आले होते. 'इंधनावर होणारा खर्च व त्यामुळे होणारे प्रदूषण कमी करण्यासाठी सार्वजनिक वाहतूक व्यवस्थेमध्ये इलेक्ट्रिक बसचा जास्तीत जास्त वापर व्हावा, यासाठी प्रयत्न सुरू आहेत. देशभरातील महापालिकांना इलेक्ट्रिक बस खरेदी करण्यासाठी अनुदान देण्यात येत आहे. आतापर्यंत जवळपास सात हजार बस खरेदीचे कार्यादेश देण्यात आले आहेत. अजून तीन हजार बस घेण्याची कार्यवाही सुरू आहे. पुढील वर्षभरात १० हजार इलेक्ट्रिक बस रस्त्यावर धावतील', असा विश्वासही त्यांनी व्यक्त केला. सार्वजनिक वाहतूक व्यवस्थेतील बसव्यतिरिक्त दुचाकी व इतर इलेक्ट्रिक वाहनांनाही चालना दिली जात आहे. अशी वाहने घेतल्यास ३० टक्के सवलत दिली जात असल्याचे ते म्हणाले.
'अतिरिक्त बस मिळाव्यात'
नवी मुंबईचे महापौर जयवंत सुतार यांची अवजड उद्योगमंत्री प्रकाश जावडेकर यांच्याकडे नवी मुंबईसाठी अतिरिक्त १०० इलेक्ट्रिक बस मंजूर कराव्यात, अशी मागणी केली. केंद्र सरकारच्या अवजड उद्योग मंत्रालयाच्या फेम-२ योजनेअंतर्गत नवी मुंबई शहरासाठी महापालिकेने २०० इलेक्ट्रिक बसचा प्रस्ताव पाठविला होता. त्यापैकी अवजड उद्योग मंत्रालयाने १००बस मंजूर केल्या होत्या.