इलेक्ट्रॉनिक वस्तूंत बिघाड

कल्याण : कल्याण-डोंबिवली शहरात मंगळवारी मध्यरात्री विजेच्या कडकडाटासह मुसळधार पाऊस कोसळला. याचा शहरातील नागरिकांना चांगलाच फटका बसला. तब्बल २५०पेक्षा जास्त इलेक्ट्रॉनिक्स वस्तू बिघडल्याचे समोर आले आहे. या वस्तू दुरुस्तीसाठी आलेल्या दुकानातून ही माहिती देण्यात आली.

परतीच्या पावसाचा चांगलाच फटका बसला असून दिवसभर पारा तब्बल ३२ अंशाच्यावर गेल्यानंतर रात्री उशीरादेखील उष्णतेचा पारा २९ अंशाच्या खाली उतरत नाही. त्यानंतर अचानक मध्यरात्री विजांचे तांडव नृत्य सुरू झाले. झोपेत असलेल्या नागरिकांना इलेक्ट्रॉनिक्स वस्तू बंद करण्याचा अवधीही न देता कडाडणाऱ्या विजांनी शेकडो घरांतील विजेची उपकरणे बिघडली. यात मोठ्या प्रमाणात फ्रीज आणि टीव्ही संचाचा समावेश असल्याचे इलेक्ट्रॉनिक दुरुस्तीच्या दुकानदारांकडून सांगण्यात आले.