म. टा. वृत्तसेवा, ठाणे
लघुदाब वीजवाहिनीला अनधिकृत केबल जोडून वीजमीटर बायपास करत वीजचोरी करणाऱ्या एका ग्राहकाविरुद्ध भिवंडी तालुका पोलिस ठाण्यात गुन्हा दाखल करण्यात आला आहे. या ग्राहकाने ४ हजार ७१० युनिटची चोरी केल्याची बाब पुढे आली असून भिवंडीत वीजचोरांचा मोठ्या प्रमाणावर सुळसुळाट झाला आहे.
भिवंडीतील कालवार गावात टोरंट पॉवर कंपनीचे कर्मचारी विद्युत पुरवठ्याची तपासणी करत होते. या तपासणीत एका पोलवरील लघुदाब वाहिनीला अनधिकृत केबल जोडल्याची बाब निदर्शनास आली. येथील एका ग्राहकाने अनधिकृतपणे वीजमीटर बायपास करून घरात वीजजोडणी घेऊन ट्यूबलाइट, पंखा, फ्रिज, टीव्ही, पाण्याची मोटर, एसी आदी वेगवेगळी उपकरणे चालविली जात होती. या वीजचोरीबाबत छायाचित्र घेत टोरंटच्या कर्मचाऱ्यानी पंचनामा केला. सहा मीटरची केबलही जप्त केली असून ७ जुलै २०१८ ते ७ जानेवारी २०१९ या कालावधीत ही वीजचोरी झाली आहे.