पालिकेचा भूखंड भंगारवाल्यांकडून गिळंकृत!

भंगार माफियांपुढे पालिका अधिकारी हतबल

म. टा. वृत्तसेवा, उल्हासनगर

उल्हासनगर महापालिकेच्या अनेक भूखंडांवर अतिक्रमणे करण्याच्या तक्रारी पालिकेत येत असताना, पालिकेच्या मागील बाजूस असलेल्या जकात नाक्याचा भूखंड भंगार विक्रेत्यांनी गिळंकृत केल्याचा प्रकार समोर आला आहे. येथे जुन्या वाहनांचे सुटे भाग केले जातात. पालिकेचे अधिकारी मात्र हा भूखंड रिकामी करण्यात हतबल दिसत आहेत.

उल्हासनगर महापालिकेच्या अनेक मालमत्ता आणि आरक्षित भूखंडावर शहरातील भूमाफिया आणि राजकीय व्यक्तींच्या संगनमताने भूखंड गिळंकृत करण्याच्या तक्रारी महापालिकेत येत असतात. त्यामुळे शहरात अनधिकृत बांधकामांचे पेव फुटले आहे. या बांधकामांवर कारवाई करण्याकडे पालिकेचे अधिकारी दुर्लक्ष करत असल्याने या प्रकारात पालिकेच्या अधिकाऱ्यांचा अप्रत्यक्ष सहभाग आणि पाठिंबा असल्याचा आरोप नागरिकांकडून होत असतो.

महापालिकेच्या मागील बाजूस जकात नाक्याचा भूखंड आहे. या भूखंडाच्या परिसरात स्विमिंग पूल आणि अग्निशमन दलाचे कार्यालय आहे. मात्र येथील जकात नाक्याचा कारभार बंद झाल्याने या मोकळ्या भूखंडाचा वापर भंगार विक्रेते करत आहेत. या ठिकाणी जुन्या मोटारी आणत त्यांचे सुटे भाग करण्याचे काम सुरू असते. त्यामुळे वाहनांची तोडफोड, गॅस सिलिंडरचा वापर, कटरचा वापर, यामुळे परिसरातील नागरिकांना याचा त्रास सहन करावा लागत आहे. या ठिकाणी या भंगारमाफियांची दादागिरी वाढत आहे. परंतु यावर कारवाई करण्यासाठी मात्र हाकेच्या अंतरावर असलेले पालिकेचे अधिकारी पुढाकार घेत नसल्याची तक्रार नागरिक करत आहेत. याबाबत महापालिकेतील वाहतूक विभागाने मालमत्ता विभागाकडे बोट दाखवले, मात्र मालमत्ता विभागातील व्यवस्थापक विशाखा सावंत यांनी तो भूखंड मालमत्ता विभागाचा असून तिथे असे कुठलेही अतिक्रमण नसल्याचे सांगत, माहिती घेऊन सांगते, अशी प्रतिक्रिया दिली. याबाबत प्रभारी उपायुक्त युवराज भदाणे यांना विचारले असता, त्या भूखंडावर अतिक्रमण झाले असल्यास भंगार माफियांना तेथून तत्काळ हटवत कारवाई करण्यात येईल, असे आश्वासन दिले. पालिकेपासून हाकेच्या अंतरावर असलेल्या मालमत्ता भंगार माफियांकडून गिळंकृत होत असताना शहरातील इतर आरक्षित भूखंड आणि मालमत्तांबाबत पालिका अधिकारी किती जागरूक आहेत, हेच यावरून समोर येते.