म. टा. वृत्तसेवा, पालघर
पालघर व ठाणे जिल्ह्यातील ग्रामीण भागातील मुलांमधील वाढत्या आरोग्याच्या समस्या लक्षात घेऊन मुख्यमंत्री वैद्यकीय सहाय्यता निधी कक्ष, मुंबई आणि जिजाऊ शैक्षणिक व सामाजिक संस्था, झडपोली यांच्या संयुक्त विद्यमाने पालघर जिल्ह्यातील ० ते १८ वयोगटातील मुलांसाठी भगवान महादेव सांबरे रुग्णालय झडपोली, ता. विक्रमगड जि. पालघर येथे शुक्रवारी सकाळी १० ते सायंकाळी ४ वाजेपर्यंत महाआरोग्य शिबीर झाले. सर्व रुग्णांची येण्या-जाण्याची सुविधा जिजाऊ शैक्षणिक व सामाजिक संस्थेकडून मोफत करण्यात आली होती.
या शिबिरामध्ये १५३५ रुग्णांची मोफत तपासणी करण्यात आली. टू डी इको सारखी तपासणी ज्यासाठी इतरत्र अडीच हजार रुपये खर्च येतो, अशी तपासणी ८७ रुग्णांची मोफत केली गेली. तसेच, १५२ रुग्णांवर मोफत शस्रक्रिया करण्यात येणार आहे. या शिबिरामध्ये मुंबईमधील नामांकित एसआरसीसी रुग्णालय, वाडिया हॉस्पिटल, मुलुंड येथील तज्ज्ञ व अनुभवी डॉक्टर आधुनिक वैद्यकीय यंत्र सामुग्रीसहित उपस्थित होते. या शिबिरामध्ये प्रामुख्याने कुपोषण, कॅन्सर, हृदयाचे आजार दमा, स्नायुसंस्था, रक्तसंस्था, मूत्रसंस्था व अन्य आजार असलेल्या रुग्णांवर मुंबई येथील वरील दोन्ही रुग्णालयांमध्ये मोफत उपचार केले जाणार आहेत.
या आरोग्य शिबिराला मुख्यमंत्री सहाय्यता कक्षाचे मुख्य कार्यकारी अधिकारी शेट्ये, जिजाऊ संस्थेचे संस्थापक नीलेश सांबरे, माजी खासदार एकनाथ गायकवाड, जिजाऊ संस्थेचे अध्यक्ष नरेश आकरे, फादर ऍग्नेल टेक्निकल इन्स्टिट्यूटचे संचालक फादर वॅलेरीयन डिसुझा, अस्थिरोग तज्ज्ञ डॉ. हेमंत सवरा, ठाण्याचे जिल्हा पिरषद सदस्य कैलास जाधव उपस्थित होते.