म. टा. वृत्तसेवा, वसई
अवघ्या ४८ तासांत महिलेच्या हत्येच्या गुन्ह्याची उकल करण्यात विरार पोलिसांना यश आले आहे. विशेष म्हणजे या महिलेच्या एका नातेवाईकाने आणि त्याच्या दोघा मित्रांनी चोरी करण्याच्या उद्देशाने हा हत्येचा कट रचल्याचे विरार पोलिसांनी सांगितले. यामध्ये दोघांना अटक करण्यात आली असून मुख्य आरोपी म्हणजेच महिलेचा नातेवाईक फरार आहे.
विरार पश्चिमेच्या विराट नगर येथील ग्रीष्मा पॅलेस या सोसायटीत मनोहर डोंबल हे त्यांची पत्नी मनीषा डोंबल, पुतणी खुशी डोंबल यांच्यासह रहात होते. दोन दिवसांआधी म्हणजेच २७ डिसेंबर रोजी राहत्या घरीच ६३ वर्षीय मनीषा यांची घरी कुणी नसताना काही व्यक्तींनी चोरीच्या उद्देशाने प्रवेश करून, त्यांच्या छातीत चाकू भोसकून हत्या केली होती. त्यानंतर घरातील रोख रक्कम आणि सोने घेऊन चोरटे फरार झाले होते. मनीषा यांचे पती सायंकाळी घरी आल्यावर हत्या झाल्याचे समजताच पोलिस ठाण्यात याबाबत गुन्हा दाखल केला होता.
या गुन्ह्याच्या तपासासाठी विरार पोलिसांनी पालघर पोलिस अधीक्षक यांच्या मार्गदर्शनाखाली विविध पथके तयार करून गुन्ह्याचा तपास चालू केला. बिल्डिंगमध्ये सीसीटीव्ही कॅमेरे नसल्याने मनोहर डोंबल घरी नसताना सोसायटीमध्ये कोण कोण बाहेरून आले होते, त्यांची माहिती आजूबाजूच्या लोकांकडून मिळवली असता यश प्रभाकर इंदवटकर, विनय कुमार टानोटी आणि विनोद पाडवी हे घरी आल्याचे समजले. यातील तपासामध्ये यश आणि विनयकुमार हे पोलिसांच्या हाती लागले. मनीषा डोंगरे हिच्या घरात चोरी करण्यासाठी गेले असता त्यांना जीवे ठार मारून सोन्या चांदीचे दागिने आणि रोख रक्कम चोरून नेल्याचे या दोघांनी पोलिसांकडे कबूल केले. मात्र यातील विनोद पदवी हा आरोपी अजूनही फरार असून हा मनीषा यांचा नातेवाईक असल्याचे पोलिसांनी सांगितले.
विनोद याने हत्येच्या तीन दिवस आधी यश याची मनीषा यांच्याशी ओळख करून दिली होती. त्यानंतर २७ डिसेंबर रोजी दुपारी एक वाजता हे तिघेही चोरी करण्याच्या उद्देशाने मनीषा एकटी असल्याचे पाहून घरात शिरले आणि संधी साधून विनय कुमार याने किचनमध्ये असलेला सुरा घेऊन मनीषा यांची हत्या केली. त्यानंतर कपाटातील सोन्या-चांदीचे दागिने घेऊन पसार झाल्याचे या आरोपींची पोलिसांना सांगितले. अवघ्या ४८ तासांत या गुन्ह्याची उकल करण्यात विरार पोलिसांना यश आले असले, तरी मुख्य आरोपी म्हणजेच मनीषा यांचा नातेवाईक विनोद हा फरार असून पोलिस अधिक तपास करत असल्याचे विरार उपविभागीय पोलिस अधिकारी रेणुका बागडे यांनी सांगितले.