म. टा. प्रतिनिधी, ठाणे
सहकारी गृहनिर्माण संस्थांसाठी राज्य सरकारकडून महाराष्ट्र सहकारी संस्था अधिनियमात दुरुस्ती करून स्वतंत्र प्रकरण तयार केले आहे. त्यामधील तरतुदीनुसार २५०पेक्षा कमी सदस्य असलेल्या गृहनिर्माण संस्थांच्या निवडणुका, या संस्थास्तरावर, सरकारने तयार केलेल्या नियमावलीनुसार घेण्याची तरतूद केली आहे. या नियमावलीसाठी सरकारने विशेष समिती स्थापन केली.
समितीने नियमावली तयार करून सरकारकडे सादर केल्यानंतर अधिसूचना येईपर्यंत बराच काळ जाणार आहे, परंतु नियमावली तयार न झाल्यामुळे निवडणूक घेण्यास गृहनिर्माण संस्थांना अडचणी येत होती. म्हणून महाराष्ट्र राज्य हाऊसिंग फेडरेशनच्या वतीने सहकारमंत्री सुभाष देशमुख यांना मुदतवाढीसाठी पत्र लिहण्यात आले होते. त्यावर सरकारने परिपत्रक काढून निवडणुकीस पात्र असलेल्या सहकारी गृहनिर्माण संस्थांना ३१ डिसेंबरपर्यंत मुदतवाढ दिली आहे, अशी माहिती दि महाराष्ट्र राज्य सहकारी गृहनिर्माण संस्था फेडरेशनचे अध्यक्ष सीताराम राणे यांनी दिले.