दरवाजा तोडून कुटुंबाला बाहेर काढले
म. टा. प्रतिनिधी, ठाणे
घोडबंदर रोडवरील पातलीपाडा परिसरात एका व्यक्तीने कुटुंबाला घरात कोंडत मारहाण केल्याचा प्रकार शनिवारी घडला. आपत्ती व्यवस्थापनचे कर्मचारी आणि अग्निशमन दलाच्या जवानांनी धाव घेत दरवाजा तोडून कुटुंबाला सुखरूप बाहेर काढले.
पातलीपाडा येथील समतानगरमध्ये राहणाऱ्या या ४५ वर्षीय व्यक्तीची मानसिक स्थिती ठीक नसल्याचे समजते. शनिवारी सायंकाळी त्याने स्वत:सह कुटुंबालाही घरात कोंडले. त्यानंतर पत्नी आणि दोन मुलांना मारहाण करण्यास सुरुवात केली. पोलिसांना माहिती मिळाल्यानंतर कासारवडवली पोलिस ठाण्यातील पोलिस त्याठिकाणी दाखल झाले. मात्र हा व्यक्ती दरवाजा उघडत नसल्याने आपत्ती व्यवस्थापन तसेच अग्निशमन दलाला बोलवण्यात आले. डोअर ब्रेकरच्या साहाय्याने दरवाजा तोडून त्या व्यक्तीला पोलिसांच्या ताब्यात दिले. तर, कुटुंबाला सुखरूप बाहेर काढण्यात आले. यावेळी लोकांची गर्दीही झाली होती.