मुलीनंतर वडिलांचीही आत्महत्या

म. टा. वृत्तसेवा, वसई

माहेरी राहायला आलेल्या घटस्फोटित मुलीने नैराश्येच्या भरात आत्महत्या केल्यानंतर, हे दु:ख सहन न झालेल्या पित्याने दुसऱ्याच दिवशी रेल्वेखाली उडी घेऊन आत्महत्या केल्याची घटना विरारमध्ये घडली असून, या घटनेने परिसरात हळहळ व्यक्त होत आहे.

विरार पूर्वेला पुलपाडा भागात मोतूकृष्णा नायडू आपल्या कुटुंबासह राहत होते. त्यांची विवाहित मुलगी मंजुला नायडू (२६) पतीसोबत घटस्फोट झाल्याने वडिलांकडे राहायला आली होती. निराशेच्या गर्तेत अडकलेल्या मंजुलाने २८ जून रोजी बेडरूममधील पंख्याच्या लोखंडी हुकास ओढणीने गळफास घेऊन आत्महत्या केली होती. मुलीने आत्महत्या केल्याचा धक्का सहन झालेले वडील मोतूकृष्णा नायडू (६०) यांनीही दुसऱ्याच दि‍वशी विरार रेल्वे स्टेशनात रेल्वेखाली उडी मारून आत्महत्या केली. दोघांच्या पार्थिवावर शनिवारी दुपारी अंत्यसंस्कार करण्यात आले. अचानक घडलेल्या या घटनेने मंजुलाचा विवाहित भाऊ जानकीराम नायडू आणि आईवर दुःखाचा डोंगर कोसळला आहे.