पोटच्या मुलीचा विनयभंग

नवी मुंबई : कोपरखैरणे भागात राहणाऱ्या एका व्यक्तीने आपल्या १७ वर्षीय अल्पवयीन मुलीसोबत अश्लील चाळे केल्याचा प्रकार उघडकीस आला आहे. या प्रकारानंतर आरोपी फरार झाला असून कोपरखैरणे पोलिसांनी त्याच्याविरोधात विनयभंगासह पोक्सो कलमान्वये गुन्हा दाखल करून त्याचा शोध सुरू केला आहे.

या घटनेतील पीडित मुलगी आपल्या आईöवडिलांसोबत कोपरखैरणे भागात राहण्यास असून ती कॉलेजचे शिक्षण घेत आहे. पीडित मुलीची आई कामावर जात असल्याने ती घरी एकटीच रहात असे. फेब्रुवारी महिन्याच्या पहिल्या आठवड्यात मुलीच्या वडिलांनी मुलीसोबत अश्लील चाळे करून तिचा विनयभंग केला. तिला शिवीगाळ करून मारहाण केली.

या प्रकाराची माहिती आपल्या आईला सांगितल्यानंतर पीडित मुलीच्या आईने पतीला समजावण्याचा प्रयत्न केला. मात्र त्याने पत्नीलादेखील शिवीगाळ करून पलायन केले. अखेर मुलीच्या आईने कोपरखैरणे पोलिस ठाणे गाठून पतीविरोधात तक्रार दाखल केली. या तक्रारीवरून पोलिसांनी मुलीच्या वडिलांवर विनयभंग व पोक्सो कलमान्वये गुन्हा दाखल करून या प्रकरणाच्या तपासाला सुरुवात केली आहे.