- श्वसनाच्या विकाराची भीती
- संघटनांकडून नागरिकांमध्ये जनजागृती
- दंड ठोठावल्यानंतरही दाणेविक्री सुरूच
म. टा. विशेष प्रतिनिधी, मुंबई
मुंबईमध्ये ठिकठिकाणी कबुतरखाने आहेत. पुण्य कमावण्याच्या संकल्पनेखाली या कबुतरखान्यांमध्ये कबुतरांना दाणे खायला घातले जातात. यामुळे त्या परिसरामध्ये अस्वच्छता तर निर्माण होतेच, मात्र त्यामुळे अनारोग्याची समस्याही उद्भवते. श्वसनाच्या विकाराची भीती असल्याने आणि करोनाचा प्रादुर्भाव होऊ नये या हेतूने कबुतरखाने बंद करण्याची मागणी अनेक मुंबईकर करत आहेत.
विलेपार्ले पूर्व रेसिडेंट वेलफेअर असोसिएशनने महात्मा गांधी रस्त्यावरील जैन मंदिराच्या बाजूला असलेल्या या कबुतरखान्याविरोधात नागरिकांमध्ये जनजागृती करायला सुरुवात केली आहे. या मंदिराच्या शेजारील इमारतीमध्ये राहणाऱ्या काही नागरिकांना अस्थम्याचा त्रास असल्याचे असोसिएशनचे कार्यकर्ते अमर करंदीकर यांनी सांगितले. महापालिकेने या मंदिराजवळ दाणे आणि पाण्यासाठी तयार करण्यात आलेला हौद तोडून टाकला आहे, तरीही काही नागरिक राजरोसपणे कबुतरांना दाणे खायला घालत असल्याचे त्यांनी सांगितले. महापालिकेच्या कर्मचाऱ्यांनी दंड केला तरी दंडाचे पैसे भरून हा कबुतरांना दाणे घालण्याचा प्रकार समोर आल्याचेही ते म्हणाले. कबुतरांच्या विष्ठेमधून जंतूसंसर्गाचा त्रास उद्भवतो. न्यूमोनिया, अस्थमा असे आजार बळावतात. सध्याच्या परिस्थितीमध्ये कबुतरांमुळे अशा आजारांना मुद्दाम निमंत्रण देणे हे अधिक घातक ठरण्याची भीती व्यक्त केली जात आहे.
अनेकदा कबुतरांसाठी घातलेले दाणे खाण्यासाठी तिथे उंदीर येतात, उंदरांना खाण्यासाठी मांजरी येतात. त्यामुळे मेलेले उंदीरही या मंदिराच्या बाहेर पडलेले आढळतात, असे सांगण्यात येत आहे. याला आळा बसण्यासाठी वॉर्ड ८४चे नगरसेवक अभिजीत सामंत यांनी पुढाकार घेऊन ती जागा स्वच्छ केलीय तिथे झाडांच्या कुंड्याही ठेवल्या. तरी या कुंड्यांमध्ये दाणे टाकून कबुतरांची सोय काही नागरिकांकडून करण्यात आल्याची तक्रार पार्लेकरांनी केली. हे खाद्य पुरवणाऱ्या दाणे विक्रेत्याला समज देण्यात आली आहे. त्याला दंडही करण्यात आला आहे. मात्र हा दाणे विक्रेता दंड भरूनही विक्री करत असल्याचे सामंत यांनी सांगितले.
कबुतरांना घाबरवणे किंवा त्यांना गैरपदार्थ खायला घालणे असे प्रकार करण्याचा हेतू नसल्याचे पार्लेकरांनी स्पष्ट केले आहे. परिसरातील अस्वच्छता दूर होऊन नागरिकांचे श्वसनाचे आजार बळावू नयेत यासाठी प्रयत्न करण्यात येत आहेत. ज्या नागरिकांना तरीही कबुतरांना दाणे खायला घालायचे असतील त्यांच्याशी वैयक्तिक स्तरावर बोलून त्यांचे मन वळवण्याचाही प्रयत्न करण्यात येणार आहे.
मदतीचे आवाहन
सध्या या मंदिराजवळ सुरक्षारक्षकाला तैनात करण्यात आले आहे. तिथे लवकरच सीसीटीव्हीदेखील बसवण्यात येणार आहे. कबुतरांना दाणे खायला घालू नये, त्यामुळे होणारे आजार यासंदर्भात त्यावर सूचना नमूद करण्यात येणार आहेत. यासंबंधी जैन मंदिर व्यवस्थापन समितीची भेट घेऊन त्यांनाही मदतीचे आवाहन करण्यात आले आहे.