पॅसेंजरमध्ये हाणामारी, प्रवाशाचा अंगठा तोडला

मटा ऑनलाइन वृत्त । पालघर

विरार-डहाणू पॅसेंजरमध्ये बुधवारी रात्री प्रवाशांमध्ये तुंबळ हाणामारी झाली. या हाणामारीत एका प्रवाशाने दुसऱ्या प्रवाशाचा अंगठा कडकडून चावल्याने या प्रवाशाचा अंगठाच तुटला आहे. मात्र इतकी मोठी घटना होऊनही रेल्वेच्या पोलिसांनी त्याकडे दुर्लक्ष केल्याचा आरोप होत आहे.

बुधवारी रात्री ११ वाजता ही घटना घडली. पश्चिम रेल्वेवरील विरार स्टेशनवर विरार-डहाणू पॅसेंजर उभी होती. त्यावेळी आपापसातील वादातून भाजी विक्रेत्यांच्या दोन गटांमध्ये मारामारी झाली. यावेळी दोन्ही गटांनी एकमेकांना लाथाबुक्क्यांनी तुडविले. काही प्रवाशांनी त्यांची भांडणं सोडविण्याचा प्रयत्न केला. पण दोन्ही गट ऐकायला तयार नव्हते. एका भाजी विक्रेत्याने एकाचा अंगठा जोरात चावला. त्यामुळे त्याचा अंगठा तुटला. या जखमी तरुणावर रुग्णालयात उपचार सुरू आहेत. हाणामारी करणारे हे युवक केळवेमधील राहणारे आहेत.